Душанбе, 15 июл, – АИ «Корвон Иттилоот». Аз 15 то 18 июл дар Тоҷикистон баландшавии ҳарорати ҳаво дар назар аст. Дар ин бора Агентии обуҳавошиносии кишвар хабар медиҳад.

Тибқи пешгӯии мутахассисони соҳа, ҳарорати ҳаво рӯзона дар минтақаҳои водигӣ то +41…+46°C мерасад. Дар ноҳияҳои доманакӯҳӣ ва кӯҳӣ ҳарорат аз +33 то +38°C дар назар буда, дар ноҳияи Дарвози Вилояти Мухтори Кӯҳистони Бадахшон ҳаво то +39…+41°C гарм мешавад.

Дар робита ба муқаррар гардидани ҳавои гарм дар минтақаҳои доманакӯҳӣ ва кӯҳии тобеи ҷумҳурӣ, вилояти Суғд ва ноҳияҳои ғарбии ВМКБ хатари омадани селҳои пайдоиши пиряхӣ боқӣ мемонад.

Ҳамзамон, бинобар афзоиши обшавии пиряхҳо ва барф, баланд шудани сатҳи об дар ҳавзаҳои дарёҳои Панҷ, Зарафшон ва Вахш пешгӯӣ карда мешавад.

Мутахассисон ба сокинон ва меҳмонони кишвар тавсия медиҳанд, ки дар рӯзҳои гармии шадид қоидаҳои бехатариро риоя намуда, аз муддати дароз дар зери офтоб мондан худдорӣ кунанд ва ҳангоми сафар ба минтақаҳои кӯҳӣ ба тавсияҳои мақомоти дахлдор таваҷҷуҳ зоҳир намоянд.

Акс: тасвири тавлидшуда https://nazarnews.org/ru/