Душанбе, 17 июл, – АИ «Корвон Иттилоот». Тоҷикистон татбиқи пайвастаи сиёсати давлатиро дар самти барқарорсозии экосистемаҳои ҷангал ва афзоиши майдони ҷангалзорҳо идома медиҳад.

Дар шаш моҳи аввали соли 2026 дар кишвар ҳаҷми назарраси корҳои барқарорсозии ҷангал анҷом дода шуда, то охири сол густариши шабакаи ниҳолхонаҳои ҷангалпарварӣ низ дар назар аст. Ин тадбирҳо ба таҳкими устувории экологӣ ва баланд бардоштани самаранокии барқарорсозии захираҳои ҷангал мусоидат хоҳанд кард.

Тавре Агентии хоҷагии ҷангали назди Ҳукумати Ҷумҳурии Тоҷикистон хабар медиҳад, дар моҳҳои январ–июни соли ҷорӣ корҳои бунёд ва барқарорсозии ҷангалҳо дар маҷмӯъ 3298,3 гектар майдонро фаро гирифтааст.

Дар ин давра дар масоҳати 1230,4 гектар ҷангалҳои нав бунёд гардида, дар 1874,4 гектар ҷангалзорҳои мавҷуда барқарор карда шуданд. Ҳамчунин дар 193,5 гектар дарахтони булут, писта, чормағз ва дигар навъҳои дарахтони дорои аҳаммияти экологӣ ва хоҷагидорӣ шинонида шуданд.

Ҳамзамон чорабиниҳо оид ба зиёд намудани зичии ҷангалзорҳо дар майдони 1121,1 гектар амалӣ гардида, корҳои нигоҳубини ҷангалҳо дар 10 ҳазору 621 гектар ва мусоидат ба барқароршавии табиии ҷангалҳо дар 7252 гектар анҷом дода шуданд.

Айни замон дар низоми хоҷагии ҷангали ҷумҳурӣ панҷ корхонаи воҳиди давлатии парвариши ниҳол, як минтақаи таҷрибавию истеҳсолӣ ва 42 ниҳолхонаи хурд, ки дар назди муассисаҳои давлатии хоҷагии ҷангал фаъолият мекунанд, амал менамоянд.

Таваҷҷуҳи махсус ба рушди заминаи истеҳсоли маводи ниҳолшинонӣ зоҳир мегардад. Дар давоми соли 2026 дар 34 муассисаи давлатии хоҷагии ҷангал таъсиси ниҳолхонаҳои нав дар масоҳати умумии 40 гектар пешбинӣ шудааст.

Татбиқи ин иқдом имкон медиҳад, ки ҳаҷми истеҳсоли ниҳолҳои босифат барои барқарорсозии минбаъдаи ҷангалзорҳо ба таври назаррас афзоиш ёбад.

Дар маҷмӯъ, Барномаи давлатии рушди соҳа таъсиси ниҳолхонаҳои нави ҷангалро дар масоҳати умумии 78,33 гектар дар солҳои 2025–2026 пешбинӣ намудааст. Ин иқдом марҳилаи муҳими таҳкими фонди давлатии ҷангал ва баланд бардоштани самаранокии фаъолияти ҳифзи муҳити зист арзёбӣ мегардад.

Ба андешаи мутахассисон, афзоиши пайвастаи майдонҳои ҷангал дар ҳифзи гуногунии биологӣ, пешгирии таназзули заминҳо, коҳиш додани таъсири тағйирёбии иқлим ва таҳкими амнияти экологии кишвар нақши калидӣ дорад. Илова бар ин, татбиқи чунин лоиҳаҳо ба истифодаи оқилонаи захираҳои табиӣ ва ноил шудан ба ҳадафҳои рушди устувори Ҷумҳурии Тоҷикистон мусоидат мекунад.

АКС: Агентии хоҷагии ҷангали назди Ҳукумати Ҷумҳурии Тоҷикистон