ООГАНИСТАН, 2026-жылдын 21-июлу – Karavan Info маалымат агенттиги. Ооганстандын чыгышындагы Нуристан провинциясында катуу суу ташкыны болду.

Расмий маалымат боюнча, кеминде 20 адам каза болуп, 80ге жакын адам жаракат алып, 100дөн ашуун адам дайынсыз жоголгон.

Кырсыктарды башкаруу башкармалыгынын өкүлү Юсуф Хамад суу ташкыны провинциянын ар кайсы аймактарына, анын ичинде борбор шаары Парунга да таасирин тийгизип, жергиликтүү тургундарга олуттуу материалдык жана адамдык зыян келтиргенин билдирди.

Анын айтымында, бул маалыматтар алдын ала маалыматтар болуп саналат жана каза болгондордун жана дайынсыз жоголгондордун саны көбөйүшү мүмкүн.

Нуристан губернаторунун кеңсеси да окуяны тастыктап, айрым аймактарда суу ташкыны алты саатка чейин созулуп, калкка олуттуу зыян келтиргенин белгиледи.

Ошол эле учурда жергиликтүү булактар маалымат каражаттарына Парунда мурда дайынсыз жоголгон деп эсептелген 43 адамдын сөөгү табылганын билдиришти. Алардын айтымында, каза болгондордун арасында Парундун мэри жана талиптердин бир нече өкүлдөрү бар.

Турак жай имараттарынын жана инфраструктуранын канчалык деңгээлде кыйраганы, ошондой эле издөө-куткаруу иштеринин жүрүшү тууралуу маалымат азырынча жарыялана элек.

Ооганстан аймактагы табигый кырсыктарга эң алсыз өлкөлөрдүн бири бойдон калууда. Ушул жылдын апрель айынан бери өлкөнүн ар кайсы провинцияларындагы суу ташкындары ондогон адамдардын өмүрүн алып, олуттуу материалдык чыгымдарга алып келди.

Сүрөт: Getty Images