Душанбе, 21 июл, – АИ «Корвон Иттилоот». Пойтахти Тоҷикистон мавқеи худро ҳамчун яке аз марказҳои муҳими фарҳангии Осиёи Марказӣ боз ҳам таҳким мебахшад. Аз 15 то 20 октябри соли 2026 шаҳри Душанбе мизбони III Фестивали байналмилалии синамои «Тоҷи Сомон» хоҳад гардид, ки намояндагони соҳаи кинои Тоҷикистон ва кишварҳои хориҷиро гирди ҳам меорад.
Дар бораи омодагӣ ба баргузории фестивал Муассисаи давлатии «Тоҷикфилм», ки ташкилкунандаи асосии чорабинӣ мебошад, хабар дод.
Имсол фестивал таҳти шиори расмии «Арҷгузорӣ ба санъати асил» баргузор гардида, ба дастгирии арзишҳои волои ҳунарӣ ва рушди синамои муосир равона шудааст.
Ҳадафи асосии фестивал муаррифии фарҳангу санъати миллии Тоҷикистон, тарғиби дастовардҳои даврони Истиқлоли давлатӣ ва густариши ҳамкориҳои байналмилалӣ дар соҳаи кинематография мебошад.
Қабули дархостҳо барои иштирок дар барномаи озмунӣ аллакай оғоз гардидааст. Коргардонҳо ва филмсозон метавонанд асарҳои худро аз 15 июн то 15 сентябри соли 2026 пешниҳод намоянд. Пас аз анҷоми муҳлати қабул ҳайати доварон беҳтарин филмҳоро барои барномаи асосии фестивал интихоб хоҳад кард.
Фестивал дар доираи татбиқи Барномаи рушди кинематографияи Ҷумҳурии Тоҷикистон барои солҳои 2023–2027 баргузор гардида, ба рушди истеҳсоли филмҳои миллӣ, такмили маҳорати касбии мутахассисон ва тавсеаи ҳамкориҳои байналмилалӣ мусоидат менамояд.
Интизор меравад, ки чорабинӣ ба майдони муҳими табодули таҷриба, муаррифии лоиҳаҳои нави кинематографӣ ва таҳкими робитаҳои касбӣ байни намояндагони соҳаи кино аз кишварҳои гуногун табдил ёбад.
Фестивали байналмилалии синамои «Тоҷи Сомон» тадриҷан ба яке аз муҳимтарин брендҳои фарҳангии Тоҷикистони муосир табдил меёбад. Баргузории мунтазами он сиёсати пайгиронаи давлатро дар самти рушди санъати кино ва ҳамгироии он ба фазои фарҳангии ҷаҳон инъикос менамояд.
Барои коргардонҳо, филмноманависон ва продюсерони тоҷик фестивал имконияти муаррифии осори эҷодӣ, пайдо намудани шарикони хориҷӣ ва ҷалби сармоягузорӣ ба лоиҳаҳои муштаракро фароҳам меорад. Ҳамзамон, иштироки кинематографистони хориҷӣ ба рушди дипломатияи фарҳангӣ, тавсеаи робитаҳои гуманитарӣ ва таҳкими нуфузи байналмилалии Тоҷикистон мусоидат мекунад.
Дар шароите, ки Тоҷикистон соҳаҳои фарҳанг, сайёҳӣ ва иқтисоди креативиро фаъолона рушд медиҳад, баргузории чунин фестивалҳо нақши Душанберо ҳамчун маркази баргузории чорабиниҳои бузурги байналмилалии фарҳангӣ дар Осиёи Марказӣ боз ҳам тақвият мебахшад.
Акс: МД «Тоҷикфилм» / АМИТ «Ховар»