Душанбе, 29 июл, – АИ «Корвон Иттилоот». Дар шаҳри Брести Ҷумҳурии Беларус ҷаласаи 19-уми Комиссияи байниҳукуматии Тоҷикистону Беларус оид ба ҳамкории тиҷоратию иқтисодӣ баргузор гардид. Музокирот таҳти раёсати ҳамзамони Вазири кишоварзии Ҷумҳурии Тоҷикистон Қурбон Ҳакимзода ва Вазири кишоварзӣ ва озуқаи Ҷумҳурии Беларус Юрий Горлов доир шуд.

Дар ҷараёни мулоқот ҷонибҳо натиҷаҳои иҷрои тавофуқҳои қаблан ҳосилшударо ҷамъбаст намуда, самтҳои нави ҳамкории дуҷонибаро, ки ба густариши шарикии иқтисодӣ ва баланд бардоштани самаранокии лоиҳаҳои муштарак нигаронида шудаанд, муайян карданд.

Таваҷҷуҳи асосӣ ба рушди робитаҳои тиҷоратию иқтисодӣ ва сармоягузорӣ, афзоиши ҳаҷми содироту воридоти мутақобила, гуногунсозии номгӯи молҳо ва таҳкими ҳамкории саноатӣ равона гардид.

Аз ҷумла, ҷонибҳо тавсеаи истеҳсолоти муштараки техникаи кишоварзӣ, мубодилаи технологияҳои муосири аграрӣ, рушди саноати коркард ва фароҳам овардани имкониятҳои нав барои пешбурди маҳсулоти маҷмааи агросаноатиро дар бозорҳои ду кишвар муҳокима намуданд.

Ҳамчунин масъалаҳои такмили инфрасохтори нақлиётиву логистикӣ, беҳтар намудани масирҳои ҳамлу нақли бор, инчунин густариши ҳамкорӣ дар соҳаҳои маориф, тандурустӣ ва робитаҳои байниминтақавӣ баррасӣ шуданд.

Натиҷаи асосии амалии ҷаласа имзои Протоколи ҷаласаи 19-уми Комиссияи байниҳукуматӣ ва Харитаи роҳ оид ба рушди ҳамкории тиҷоратию иқтисодӣ гардид, ки нақшаи мушаххаси чорабиниҳоро барои густариши робитаҳои соҳибкорӣ, ҷалби сармоя ва афзоиши гардиши мол миёни ду кишвар дар бар мегирад.

Натиҷаҳои ҷаласа дар Брест нишон медиҳанд, ки муносибатҳои Тоҷикистону Беларус аз марҳилаи мувофиқаи самтҳои афзалиятнок ба марҳилаи амалии татбиқи ташаббусҳои муштараки иқтисодӣ ворид шудаанд.

Тасдиқи тавофуқҳо дар шакли Харитаи роҳ механизми дарозмуддати рушди ҳамкории саноатӣ, навсозии маҷмааи агросаноатӣ ва густариши ҳамкории сармоягузориро фароҳам месозад. Дар шароити тағйироти босуръати бозорҳои Авруосиё, ташкили занҷираҳои устувори истеҳсоливу логистикӣ аҳамияти бештар касб намуда, метавонад ба афзоиши гардиши мол, таҳкими амнияти озуқаворӣ ва баланд бардоштани рақобатпазирии иқтисодиёти Тоҷикистону Беларус мусоидат намояд.

АКС: Сафорати Ҷумҳурии Тоҷикистон дар Ҷумҳурии Беларус.