Душанбе, 31 июл, – АИ «Корвон Иттилоот». Таҳти раёсати муовини Сарвазири Ҷумҳурии Тоҷикистон, раиси Шурои миллии об Сулаймон Зиёзода ҷаласаи дуюми Шурои миллии об баргузор гардид, ки ба масъалаҳои такмили сиёсати давлатӣ дар самти истифодаи оқилонаи захираҳои об бахшида шуд.
Дар кори ҷаласа ҳайати роҳбарикунанда таҳти роҳбарии Вазири энергетика ва захираҳои оби Ҷумҳурии Тоҷикистон Далер Ҷумъа, аъзои Шурои миллӣ, инчунин намояндагони созмонҳои байналмилалӣ ва шарикони рушд иштирок намуданд.
Мавзӯи асосии муҳокима ҳамоҳангсозии сиёсати давлатӣ дар самти истифодаи самараноки замин ва об, коҳиш додани талафоти захираҳои обӣ, баланд бардоштани самаранокии низоми мелиоратсия ва таҷдиди зерсохтори гидротехникӣ буд. Ҳамчунин масъалаҳои баланд бардоштани устувории соҳаи об ба таъсири тағйирёбии иқлим мавриди баррасии амиқ қарор гирифтанд.
Дар ҷараёни ҷаласа иҷрои барномаҳои калидии давлатӣ таҳлил гардид. Иштирокчиён натиҷаҳои миёнамуҳлати татбиқи Нақшаи амал оид ба Стратегияи миллии об барои солҳои 2025–2027-ро ҷамъбаст намуда, вазифаҳои марҳилаи навбатиро муайян карданд. Ҳамзамон, ҷараёни иҷрои Барномаи рушди мелиоратсия ва обёрӣ барои солҳои 2024–2026, аз ҷумла масъалаҳои истифодаи самараноки заминҳои обёришаванда, таҷдиди шабакаҳои обёрӣ ва навсозии каналҳо мавриди таҳлил қарор гирифт.
Яке аз масъалаҳои муҳими рӯзнома муҳокимаи лоиҳаи Нақшаи идоракунии захираҳои оби ҳавзаи дарёи Кофарниҳон буд. Ҳуҷҷати мазкур гузариш ба низоми муосири идоракунии ҳавзавиро бо дарназардошти хусусиятҳои табиӣ, иқтисодӣ ва экологӣ пешбинӣ намуда, ба стандартҳои байналмилалии таъмини амнияти об мутобиқ мебошад.
Дар анҷоми ҷаласа қарорҳои дахлдор қабул гардида, барои вазорату идораҳои соҳавӣ самтҳои минбаъдаи татбиқи сиёсати давлатии соҳаи об муайян карда шуданд.
Татбиқи принсипи идоракунии ҳавзавӣ яке аз муҳимтарин марҳилаҳои ислоҳоти низоми идоракунии захираҳои об дар Тоҷикистон ба ҳисоб меравад. Баррасии Нақшаи идоракунии ҳавзаи дарёи Кофарниҳон нишон медиҳад, ки кишвар пайгирона принсипҳои идоракунии ҳамгирошудаи захираҳои обро ҷорӣ намуда, манфиатҳои соҳаҳои кишоварзӣ, энергетика, саноат, ҳифзи муҳити зист ва аҳолиро дар як низоми ягона ҳамоҳанг месозад.
Барои Тоҷикистон, ки дорои захираҳои бузурги гидрологӣ буда, ҳамчун ташаббускори як қатор иқдомҳои ҷаҳонии Созмони Милали Муттаҳид дар масъалаҳои об эътироф гардидааст, такмили низоми миллии идоракунии об аҳамияти стратегӣ дорад. Ҳамкории сохторҳои давлатӣ ва шарикони байналмилалӣ заминаи коҳиши талафоти об, баланд бардоштани самаранокии истифодаи зерсохтор ва таҳкими амнияти обро дар дарозмуддат фароҳам оварда, ба рушди устувори Тоҷикистон ва суботи тамоми минтақаи Осиёи Марказӣ мусоидат менамояд.
АКС: Вазорати энергетика ва захираҳои оби Ҷумҳурии Тоҷикистон