Душанбе, 31 июл, – АИ «Корвон Иттилоот». Рӯзҳои 1 ва 2 августи соли 2026 дар боғҳои фарҳангу фароғатии пойтахт Рӯзҳои фарҳанги шаҳри Бохтар, инчунин ноҳияҳои Ховалинг, Сангвор, Дарвоз, Балҷувон ва Рашт баргузор мегарданд. Чорабиниҳо бо ташаббуси Вазорати фарҳанги Ҷумҳурии Тоҷикистон дар доираи барномаи ҷумҳуриявии таҷлили 35-солагии Истиқлоли давлатӣ ташкил шуда, оғози онҳо соати 16:00 дар назар гирифта шудааст.
Тибқи барномаи тасдиқшуда, 1 август дар Боғи фарҳангии ба номи Абулқосим Фирдавсӣ Рӯзи фарҳанги шаҳри Бохтар, дар Боғи ба номи Садриддин Айнӣ Рӯзи фарҳанги ноҳияи Ховалинг ва дар Боғи ба номи Алишер Навоӣ Рӯзи фарҳанги ноҳияи Сангвор баргузор мешавад.
2 август барномаи фарҳангиро ноҳияҳои Дарвоз, Рашт ва Балҷувон идома медиҳанд. Рӯзи фарҳанги ноҳияи Дарвоз дар Боғи ба номи Абулқосим Фирдавсӣ, ноҳияи Рашт дар Боғи ботаникии «Ирам» ва ноҳияи Балҷувон дар Боғи кӯдакон баргузор мегардад.
Барномаи чорабиниҳо хеле ғанӣ буда, намоиши маҳсулоти кишоварзӣ, дастовардҳои истеҳсолкунандагони маҳаллӣ, ярмаркаҳои ҳунарҳои мардумӣ, осори ҳунармандони санъати амалӣ, муаррифӣ ва чашидани таомҳои миллиро дар бар мегирад. Ҳамчунин барои меҳмонон барномаҳои консертии идона бо иштироки ҳунармандони маъруф ва дастаҳои эҷодӣ пешниҳод карда мешаванд.
Таваҷҷуҳи махсус ба ҳифзи хусусиятҳои фарҳангии ҳар як минтақа равона гардидааст, то сокинон ва меҳмонони пойтахт бо анъанаҳо, урфу одат ва мероси фарҳангии гӯшаҳои гуногуни Тоҷикистон аз наздик ошно шаванд.
Баргузории Рӯзҳои фарҳанги минтақаҳо дар пойтахт дар соли ҷашнии Истиқлоли давлатӣ аҳамияти хосса дорад. Чунин ташаббусҳо ба таҳкими ҳувияти миллӣ ва ташаккули фазои ягонаи фарҳангӣ мусоидат намуда, барои ҳар як минтақа имконият фароҳам меоранд, ки дастовардҳо, анъанаҳо ва иқтидори эҷодии худро муаррифӣ намояд.
Дар баробари аҳамияти фарҳангӣ, ин иқдом дорои таъсири иҷтимоиву иқтисодӣ низ мебошад. Муаррифии маҳсулоти кишоварзӣ, ҳунарҳои мардумӣ ва имкониятҳои сайёҳии минтақаҳо ба рушди сайёҳии дохилӣ, густариши ҳамкориҳои байни минтақаҳо ва пешбурди брендҳои миллӣ мусоидат мекунад. Дар маҷмӯъ, чунин чорабиниҳо сиёсати давлатии ҳифзи мероси ғайримоддии фарҳангӣ, дастгирии ҳунарҳои мардумӣ ва таҳкими ваҳдати фарҳангии ҷомеаи Тоҷикистонро инъикос менамоянд.
АКС: Вазорати фарҳанги Ҷумҳурии Тоҷикистон