Душанбе, 31 июл, – АИ «Корвон Иттилоот». Дар меҳмонхонаи «Кангурт» 30 июл Мизи мудаввари миллии сатҳи баланд таҳти унвони «Гендер, технологияҳо ва савдои одамон дар Ҷумҳурии Тоҷикистон», бахшида ба Рӯзи ҷаҳонии муқовимат ба савдои одамон баргузор гардид.

Дар кори ҳамоиш тақрибан 60 нафар намояндагони мақомоти давлатии Ҷумҳурии Тоҷикистон, аъзои Комиссияи байниидоравӣ оид ба муқовимат ба савдои одамони назди Ҳукумати Ҷумҳурии Тоҷикистон, намояндагони созмонҳои байналмилалӣ, ташкилотҳои ғайриҳукуматии хизматрасон ба қурбониёни савдои одамон ва дигар сохторҳои марбута иштирок намуданд.

Чорабинӣ бо сухани ифтитоҳии муовини якуми Вазири корҳои дохилии Ҷумҳурии Тоҷикистон, раиси Комиссияи байниидоравӣ оид ба муқовимат ба савдои одамон Абдураҳмон Аламшозода оғоз гардид. Ҳамчунин Ҳамоҳангсози доимии Созмони Милали Муттаҳид дар Ҷумҳурии Тоҷикистон Парвати Рамасвами ва роҳбари шуъбаи ҳамкорӣ дар Намояндагии Иттиҳоди Аврупо дар Ҷумҳурии Тоҷикистон Изабел Уриз доир ба аҳамияти ҳамкориҳои байналмилалӣ дар мубориза бо ин падида суханронӣ намуданд.

Иштирокчиён таъкид карданд, ки дар шароити рушди босуръати технологияҳои рақамӣ, тағйирёбии равандҳои муҳоҷират ва таъсири омилҳои иҷтимоиву иқтисодӣ савдои одамон шаклҳои нави ҷиноятиро касб кардааст. Имрӯз шабакаҳои иҷтимоӣ, эълонҳои бардурӯғи кор, платформаҳои интернетӣ ва дигар воситаҳои рақамӣ ба яке аз роҳҳои асосии ҷалб ва истисмори қурбониён табдил ёфтаанд.

Муовини роҳбари Маркази миллӣ оид ба мубориза бо савдои одамони Вазорати корҳои дохилии Ҷумҳурии Тоҷикистон Беҳрӯз Бухоризода дар мавзӯи «Таҷрибаи Тоҷикистон дар мубориза бо савдои одамон бо мақсади фаъолияти маҷбурии ҷиноятӣ дар марказҳои қаллобӣ» маърӯза намуда, иштирокчиёнро бо тадбирҳои амалишавандаи кишвар оид ба пешгирӣ ва мубориза бо ин навъи ҷиноят шинос кард.

Дар ҷараёни муҳокимаҳо масъалаҳои истифодаи технологияҳои иттилоотӣ аз ҷониби гурӯҳҳои ҷиноятӣ, усулҳои нави ҷалб ва истисмори қурбониён, инчунин робитаи ин равандҳо бо масъалаҳои баробарии гендерӣ ва ҳифзи ҳуқуқи инсон мавриди баррасии ҳамаҷониба қарор гирифтанд.

Дар анҷоми ҳамоиш иштирокчиён зарурати таҳкими ҳамкории мақомоти давлатӣ, шарикони байналмилалӣ ва ҷомеаи шаҳрвандиро барои мутобиқ намудани механизмҳои муқовимат ба таҳдидҳои нави технологӣ ва баланд бардоштани самаранокии мубориза бо савдои одамон таъкид намуданд.

Рушди технологияҳои рақамӣ хусусияти ҷиноятҳои фаромиллиро, аз ҷумла савдои одамонро, ба таври назаррас тағйир додааст. Интернет ва шабакаҳои иҷтимоӣ, ки барои рушди ҷомеа имкониятҳои нав фароҳам меоранд, ҳамзамон аз ҷониби гурӯҳҳои ҷиноятӣ барои ҷалб ва истисмори қурбониён истифода мешаванд. Аз ин рӯ, такмили қонунгузорӣ, истифодаи технологияҳои муосири назорат ва тавсеаи ҳамкориҳои байналмилалӣ аҳамияти рӯзафзун пайдо мекунад.

Барои Тоҷикистон таҳкими ҳамоҳангии байниидоравӣ ва густариши ҳамкорӣ бо созмонҳои байналмилалӣ яке аз самтҳои муҳими сиёсати давлатӣ дар таъмини амнияти шаҳрвандон ба ҳисоб меравад. Муносибати ҳамаҷониба, ки мақомоти ҳифзи ҳуқуқ, сохторҳои судӣ, хадамоти иҷтимоӣ ва ҷомеаи шаҳрвандиро муттаҳид месозад, барои ҳифзи ҳуқуқи қурбониён, пешгирии ҷиноят ва иҷрои уҳдадориҳои байналмилалии кишвар дар соҳаи ҳуқуқи инсон заминаи устувор фароҳам меорад.

АКС: Вазорати корҳои дохилии Ҷумҳурии Тоҷикистон