Душанбе, 31 июл, – АИ «Корвон Иттилоот». Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар як қатор вазоратҳо, идораҳо ва сохторҳои қудратии кишвар таъйиноти кадрӣ анҷом дод.

Тибқи фармонҳои Президенти Ҷумҳурии Тоҷикистон, ба вазифаҳои роҳбарикунанда дар воҳидҳои Гвардияи миллии Ҷумҳурии Тоҷикистон афсарони соҳибтаҷриба ва дорои маҳорати баланди касбӣ таъин гардиданд.

Бо қарорҳои Ҳукумати Ҷумҳурии Тоҷикистон инчунин дар Вазорати саноат ва технологияҳои нав, Кумитаи бехатарии озуқаворӣ ва Хадамоти иҷрои назди Ҳукумати Ҷумҳурии Тоҷикистон муовинони роҳбарон таъин шуданд, ки масъалаҳои рақамикунонӣ ва татбиқи технологияҳои муосирро ҳамоҳанг хоҳанд кард.

Тағйироти кадрӣ ҳамчунин Вазорати мудофиаи Ҷумҳурии Тоҷикистон-ро фаро гирифт. Ба вазифаи сардорони як қатор раёсатҳо ва фармондеҳони воҳидҳои ҳарбӣ мутахассисони ҷавоне таъин шуданд, ки ду ва зиёда муассисаҳои таҳсилоти олии ҳарбиро дар дохил ва хориҷи кишвар хатм намудаанд. Ин иқдом ба таҳкими иқтидори кадрии Қувваҳои Мусаллаҳ ва ҷорӣ намудани усулҳои муосири идоракунии ҳарбӣ нигаронида шудааст.

Дар асоси натиҷаҳои арзёбии фаъолияти комиссариатҳои ҳарбӣ ва бо мувофиқаи Президенти Ҷумҳурии Тоҷикистон дар як қатор шаҳру ноҳияҳои кишвар ивазшавии комиссарони ҳарбӣ анҷом дода шуд.

Тағйирот комиссариатҳои ҳарбии ноҳияҳои Спитамен, Кӯҳистони Мастчоҳ, Айнӣ ва Шаҳристон, шаҳрҳои Истаравшан, Конибодом ва Гулистон дар вилояти Суғд, ноҳияҳои Восеъ, Кӯшониён, Хуросон, Темурмалик ва Қубодиён, шаҳрҳои Кӯлоб, Бохтар ва Левакант дар вилояти Хатлон, Вилояти Мухтори Кӯҳистони Бадахшон, инчунин ноҳияҳои Рашт, Лахш, Файзобод ва шаҳри Ваҳдат-ро дар бар гирифт. Ба ин вазифаҳо мутахассисони соҳибтаҷриба таъин шуданд.

Таъйиноти нав инчунин дар Қӯшунҳои сарҳадии Кумитаи давлатии амнияти миллии Ҷумҳурии Тоҷикистон анҷом дода шуд. Аз ҷумла, роҳбарияти Раёсати Қӯшунҳои сарҳадӣ дар ВМКБ, як қатор дастаҳои сарҳадӣ ва воҳидҳои дастгоҳи марказӣ аз ҳисоби мутахассисони дорои омодагии баланди касбӣ ва таҷрибаи идоракунӣ мукаммал гардиданд.

Зимни мулоқот бо роҳбарони таъингардида Президенти Ҷумҳурии Тоҷикистон муҳтарам Эмомалӣ Раҳмон таъкид намуданд, ки таъмини амнияту субот, рушди минбаъдаи кишвар ва баланд бардоштани сатҳу сифати зиндагии аҳолӣ аз иҷрои содиқонаву масъулонаи вазифаҳои хизматӣ аз ҷониби ҳар як хизматчии давлатӣ ва ҳарбӣ вобастагии мустақим дорад.

Пешвои миллат ҳамчунин зикр карданд, ки бо дарназардошти вазъи ноустувори байналмилалӣ Ҳукумати Ҷумҳурии Тоҷикистон барои беҳтар намудани шароити хизмат, таҳкими заминаи моддию техникӣ ва таъмин намудани Қувваҳои Мусаллаҳ бо таҷҳизоти муосир тадбирҳои пайгирона меандешад.

Дар анҷоми мулоқот Сарвари давлат ба роҳбарони таъингардида супориш доданд, ки барои таҳкими интизоми хизматӣ, риояи қатъии оинномаҳои ҳарбӣ, санадҳои соҳавӣ ва нигоҳ доштани омодабошии доимии ҷангии Қувваҳои Мусаллаҳ ва дигар сохторҳои ҳарбӣ чораҳои муассир андешанд.

Марҳилаи нави таъйиноти кадрӣ идомаи сиёсати навсозии идоракунии давлатӣ ва таҳкими иқтидори институтсионалии кишварро инъикос мекунад. Таваҷҷуҳи махсус ба рақамикунонии мақомоти давлатӣ аз суръат бахшидани ислоҳоти технологӣ дарак медиҳад, дар ҳоле ки таҷдиди ҳайати роҳбарикунандаи сохторҳои қудратӣ ба баланд бардоштани сатҳи касбият, самаранокии идоракунӣ ва таҳкими амнияти миллӣ равона шудааст.

Ҷалби афсарони ҷавони дорои таҳсилоти муосири ҳарбӣ дар баробари истифодаи таҷрибаи мутахассисони соҳибтаҷриба сиёсати ҳамоҳангсозии таҷдиди кадрҳо ва ҳифзи пайдарҳамии идоракуниро нишон медиҳад. Дар шароити таҳаввулоти минтақа ва ҷаҳон чунин қарорҳо заминаи муҳим барои таҳкими иқтидори давлатӣ, баланд бардоштани қобилияти мудофиавӣ ва рушди устувори Ҷумҳурии Тоҷикистон ба ҳисоб мераванд.

АКС: Хадамоти матбуоти Президенти Ҷумҳурии Тоҷикистон