Душанбе, 01 август, – АИ «Корвон Иттилоот». Понздаҳ зани ҷавони ҳуқуқшинос марҳилаи дуюми «Барномаи феллоушип барои занони ҷавони ҳуқуқшинос»-ро, ки бо дастгирии Барномаи рушди Созмони Милали Муттаҳид, Платформаи адолати гендерӣ ва Вазорати федералии ҳамкории иқтисодӣ ва рушди Олмон амалӣ гардид, бомуваффақият хатм намуданд.

Ҳадафи асосии барнома баланд бардоштани сатҳи касбии ҳуқуқшиносони ҷавон, рушди малакаҳои амалии онҳо ва афзоиши иштироки занон дар фаъолияти ҳуқуқшиносӣ мебошад. Вазорати корҳои хориҷии Финландия низ аз ҷумлаи шарикони асосии татбиқи ин ташаббус ба ҳисоб меравад.

Тибқи маълумоти пешниҳодшуда, имрӯз дар Тоҷикистон тақрибан 900 адвокат фаъолият мекунанд ва ба ҳисоби миёна ба ҳар як адвокат зиёда аз 11 ҳазор нафар аҳолӣ рост меояд. Ин нишондиҳанда зарурати идомаи ислоҳотро ҷиҳати баланд бардоштани дастрасии шаҳрвандон ба адолати судӣ ва хизматрасониҳои ҳуқуқӣ боз ҳам равшантар менамояд.

Дар ҷараёни омӯзиш иштирокчиён малакаҳои касбии худро такмил дода, усулҳои муосири пешниҳоди ёрии ҳуқуқии босифатро аз худ карданд ва дар муҳокимаҳои марбут ба ислоҳоти низоми ҳуқуқӣ фаъолона ширкат варзиданд.

Яке аз натиҷаҳои муҳими барнома афзоиши иштироки занон дар касби ҳуқуқшиносӣ мебошад. Ба шарофати барномаҳои таҷрибаомӯзӣ ва феллоушип шумораи занон дар ин бахш 12 фоиз зиёд гардидааст, ки барои ташаккули насли нави мутахассисони соҳибихтисос ва таҳкими иқтидори кадрии соҳа замина фароҳам меорад.

Дар доираи барнома инчунин ба беш аз 320 нафар ёрии ҳуқуқии ройгон расонида шуд, ки 73 фоизи баҳрабардорандагони он занон буданд.

Илова бар ин, иштирокчиёни барнома дар ҷараёни мизи мудаввар дар шаҳри Душанбе бо иштироки намояндагони Суди Олӣ, Прокуратураи генералӣ, Муассисаи давлатии «Маркази ёрии ҳуқуқӣ» ва Корхонаи воҳиди давлатии «Муассисаи бақайдгирии молу мулки ғайриманқул» вобаста ба масъалаҳои мубрами низоми ҳуқуқӣ тавсияҳои ба принсипҳои баробарии гендерӣ мутобиқ пешниҳод намуданд.

Рушди иқтидори кадрии низоми ҳуқуқӣ яке аз омилҳои муҳими таҳкими волоияти қонун ва баланд бардоштани самаранокии фаъолияти ниҳодҳои давлатӣ ба шумор меравад. Барои Тоҷикистон, ки таъминот бо адвокатҳо ҳанӯз ҳам маҳдуд мебошад, омодасозии мутахассисони ҷавон аҳамияти стратегӣ дорад.

Афзоиши иштироки занон дар касби ҳуқуқшиносӣ танҳо масъалаи таъмини тавозуни гендерӣ нест. Он ба беҳтар гардидани дастрасии шаҳрвандон ба ёрии ҳуқуқӣ, таҳкими эътимоди ҷомеа ба мақомоти адолати судӣ ва ташаккули низоми фарогиртару касбӣ мусоидат мекунад. Ҳамкории муассир миёни созмонҳои байналмилалӣ ва сохторҳои давлатӣ дар татбиқи чунин барномаҳо аз муносибати ҳамаҷониба ба рушди бахши ҳуқуқ, баробарии имкониятҳо ва таҳкими давлати ҳуқуқбунёд шаҳодат медиҳад.

АКС: UNDP Tajikistan / German Embassy Dushanbe