Душанбе, 07 август, – АИ «Корвон Иттилоот». 20 октябри соли 2026 дар Осорхонаи тамаддуни Рим дар Италия нахустин намоишгоҳи байналмилалии «Тоҷикистон – кишвари ёдгориҳои нодир» ифтитоҳ хоҳад ёфт. Ташкилкунандаи он Муассисаи давлатии «Осорхонаи миллӣ»-и Дастгоҳи иҷроияи Президенти Ҷумҳурии Тоҷикистон мебошад. Лоиҳаи бузурги фарҳангӣ ба муносибати ҷашни 35-солагии Истиқлоли давлатии Ҷумҳурии Тоҷикистон роҳандозӣ шудааст.
Дар экспозитсия намунаҳои нодири мероси моддии халқ, ки дар натиҷаи таҳқиқоти бостоншиносӣ аз муҳимтарин ёдгориҳои таърихии кишвар дарёфт гардидаанд, ба маърази тамошо гузошта мешаванд. Меҳмонон имконият пайдо мекунанд, ки бо осори аслии тамаддунҳое ошно шаванд, ки ҳазорсолаҳо пеш дар қаламрави Тоҷикистон ташаккул ёфта, дар рушди фарҳанги Осиёи Марказӣ нақши муҳим бозидаанд.
Дар байни бозёфтҳои асосӣ нигораҳои нодир аз шаҳристони қадимаи Тахти Сангин, Панҷакенти бостонӣ, дайри буддоии Аҷинатеппа ва дигар ёдгориҳои барҷастаи таърихию фарҳангии Тоҷикистон ҷойгоҳи махсус доранд. Экспонатҳо давраи васеи таърихиро аз асри VI то милод то асри XX милодӣ дар бар гирифта, пайдарҳамии рушди фарҳанг, ҳунар ва тамаддуни халқи тоҷикро инъикос мекунанд.
Ҳадафи асосии лоиҳа муаррифии таърихи бостонӣ, арзишҳои фарҳангӣ ва мероси тамаддунии Тоҷикистон дар сатҳи байналмилалӣ мебошад. Ҳамзамон намоишгоҳ ба таҳкими муколамаи фарҳангӣ байни Тоҷикистон ва Италия, густариши ҳамкориҳои гуманитарӣ ва ҷалби таваҷҷуҳи ҷомеаи ҷаҳонӣ ва сайёҳон ба имкониятҳои таърихию сайёҳии кишвар равона шудааст.
Баргузории чунин намоишгоҳ дар яке аз бонуфузтарин осорхонаҳои Италия имкониятҳои навро барои муаррифии мероси фарҳангии Тоҷикистон дар Аврупо фароҳам оварда, ҳамкориҳоро дар соҳаҳои осорхонашиносӣ, илм ва ҳифзи мероси таърихӣ тақвият мебахшад.
Намоишгоҳи «Тоҷикистон – кишвари ёдгориҳои нодир» танҳо як чорабинии осорхонавӣ нест, балки абзори муассири дипломатияи фарҳангӣ ба шумор меравад. Ба намоиш гузоштани осори нодири таърихӣ дар яке аз муҳимтарин осорхонаҳои шаҳри Рим аз таваҷҷуҳи рӯзафзуни ҷомеаи байналмилалӣ ба таърих ва мероси тамаддунии Тоҷикистон шаҳодат дода, саҳми кишварро дар рушди фарҳанги ҷаҳонӣ боз ҳам бештар муаррифӣ мекунад.
Арзиши махсуси ин лоиҳа дар он аст, ки бори аввал ҷомеаи Аврупо бо ёдгориҳои аслии тамаддунҳои Бохтару Суғд, мероси Роҳи бузурги Абрешим ва анъанаҳои ҳазорсолаи мардуми Тоҷикистон аз наздик шинос хоҳад шуд. Чунин ташаббусҳо ба таҳкими робитаҳои гуманитарии Тоҷикистону Италия, боло бурдани нуфузи байналмилалии кишвар ва рушди сайёҳии фарҳангӣ, ҳамкориҳои илмӣ ва мубодилаи осорхонавӣ мусоидат мекунанд.
Дар арафаи таҷлили 35-солагии Истиқлоли давлатии Ҷумҳурии Тоҷикистон баргузории чунин намоишгоҳи сатҳи баланд боз як далели он аст, ки фарҳанг имрӯз ба яке аз воситаҳои муҳими дипломатияи байналмилалӣ, таҳкими муколамаи тамаддунҳо ва муаррифии бренди миллии Тоҷикистон дар арсаи ҷаҳонӣ табдил ёфтааст.
АКС: Муассисаи давлатии «Осорхонаи миллӣ»-и Дастгоҳи иҷроияи Президенти Ҷумҳурии Тоҷикистон