Душанбе, 07 август, – АИ «Корвон Иттилоот». Дар Вазорати молияи Ҷумҳурии Тоҷикистон муаррифии Барномаи стипендиявии Ҷопони Хазинаи байналмилалии асъор барои кишварҳои Осиё (JISPA) баргузор гардид. Лоиҳа зимни мулоқоти расмии Муовини якуми вазири молияи Ҷумҳурии Тоҷикистон Юсуф Маҷидӣ бо директори Дафтари минтақавии Хазинаи байналмилалии асъор оид ба минтақаи Осиё ва Уқёнуси Ором Такаши Нагаока ва менеҷери барнома Сайка Кин муаррифӣ шуд.

Мулоқот қадами навбатӣ дар таҳкими ҳамкориҳои Тоҷикистон бо Хазинаи байналмилалии асъор ва Ҳукумати Ҷопон дар самти рушди иқтидори кадрии мақомоти давлатӣ ва ҷорӣ намудани усулҳои муосири идоракунии молияи давлатӣ арзёбӣ гардид.

Дар маркази музокирот масъалаҳои густариши имкониятҳои таҳсилӣ ва касбии кормандони Вазорати молия ва дигар сохторҳои давлатӣ қарор доштанд. Таваҷҷуҳи махсус ба нақши барномаи JISPA дар омода намудани мутахассисоне зоҳир гардид, ки қобилияти таҳияи сиёсати самараноки макроиқтисодӣ, такмили банақшагирии буҷетӣ ва татбиқи воситаҳои муосири идоракунии молиявиро доранд.

Иштирокчиён инчунин нақши барнома дар таҳкими рушди институтсионалии мақомоти давлатӣ, баланд бардоштани сатҳи тахассуси хизматчиёни давлатӣ ва такмили заминаҳои методологии сиёсати иқтисодиро ҳамаҷониба баррасӣ карданд.

Мавзӯи муҳими дигари мулоқот дурнамои ҷалби мутахассисони тоҷик ба барномаҳои магистрӣ ва доктории донишгоҳҳои пешрафтаи Ҷопон буд, ки бо дастгирии Хазинаи байналмилалии асъор амалӣ мешаванд. Ба андешаи ҷонибҳо, чунин ташаббусҳо барои омода намудани насли нави мутахассисони соҳаи идоракунии давлатӣ бо донишҳои муосир ва таҷрибаи байналмилалӣ мусоидат хоҳанд кард.

Дар анҷоми мулоқот намояндагони Вазорати молия, Хазинаи байналмилалии асъор ва ҷониби Ҷопон омодагии худро барои рушди минбаъдаи ҳамкориҳо дар самти омода намудани кадрҳо, такмили ихтисоси мутахассисон ва мубодилаи таҷрибаи пешқадам дар идоракунии молияи давлатӣ тасдиқ намуданд.

Рушди сармояи инсонӣ имрӯз яке аз омилҳои асосии рушди устувори иқтисодиёти Тоҷикистон ба ҳисоб меравад. Иштироки мутахассисони ватанӣ дар барномаҳои байналмилалии таълимӣ на танҳо сатҳи касбияти хизматчиёни давлатиро боло мебардорад, балки барои ҷорӣ намудани усулҳои муосири банақшагирии стратегӣ, идоракунии буҷет ва таҳлили макроиқтисодӣ низ замина фароҳам меорад.

Арзиши махсуси барномаи JISPA дар он аст, ки иқтидори илмии донишгоҳҳои пешрафтаи Ҷопон ва таҷрибаи коршиносии Хазинаи байналмилалии асъорро муттаҳид менамояд. Омода намудани мутахассисони тоҷик дар доираи ин ташаббус ба такмили минбаъдаи низоми молиявию буҷетии кишвар, баланд бардоштани самаранокии идоракунии давлатӣ ва татбиқи стандартҳои байналмилалӣ дар сиёсати иқтисодӣ мусоидат хоҳад кард.

Дар дурнамои дарозмуддат чунин барномаҳои таълимӣ ҳамчун сармоягузории стратегӣ ба рушди институтсионалии давлат, таҳкими иқтидори кадрии бахши молия ва баланд бардоштани устувории иқтисодиёти миллӣ дар шароити тағйирёбии иқтисоди ҷаҳонӣ аҳамияти муҳим доранд.

АКС: Вазорати молияи Ҷумҳурии Тоҷикистон