Бишкек, 2026-жылдын 13-августу – Караван Инфо маалымат агенттиги. 13-августта Кыргызстандын Президентинин Ош облусундагы ыйгарым укуктуу өкүлү Аманкан Кенжебаев Кытайдын Оштогу башкы консулу Ли Минче менен жолугушту.

Өкүлчүлүктүн маалыматы боюнча, тараптар кыргыз-кытай достук мамилелерин андан ары чыңдоо жана аймактар аралык кызматташтыкты өнүктүрүү маселелерин талкуулашты.

Аманкан Кенжебаев Ли Минчэни дайындалышы менен куттуктап, Оштогу Кытайдын Башкы консулдугунун ишин кайра жандандырганын жогору баалады.

Жолугушууда Ош облусу көп жылдардан бери Кытайдын бир катар аймактары менен достук жана бир туугандык байланыштарды өнүктүрүп келе жатканы жана бул байланыштарды андан ары кеңейтүүгө кызыкдар экени белгиленди.

Тараптар ошондой эле соода-экономикалык, инвестициялык, гуманитардык жана башка тармактардагы кызматташууну өнүктүрүүнүн олуттуу мүмкүнчүлүктөрүн баса белгилешти.

Кытайдын Ош шаарындагы Башкы консулдугунун келечектеги ишмердүүлүгү жана бул жааттагы тыгыз кызматташуунун мааниси өзүнчө талкууланды.

Жолугушуунун жыйынтыгында тараптар өз ара түшүнүшүү, ишеним жана достук мамилелерге негизделген кызматташтыкты мындан ары да бекемдөөгө даяр экендиктерин билдиришти.