AFG'ONISTON, 2026-yil 27-avgust – Karavan Info axborot agentligi. Afg'oniston Oliy sudi so'nggi besh yil ichida Afg'oniston qamoqxonalaridagi 16 000 dan ortiq mahbus avf etilganini e'lon qildi.

Tolibon Oliy sudi vakili Mansur Ahmad Hamzaning aytishicha, harakat yetakchisi Haybatulloh Axundzodaning buyrug'i va Oliy sud raisi Abdul Hakim Haqqoniyning ko'rsatmalariga asoslanib, so'nggi besh yil ichida 16 468 mahbus afv etilgan va 11 159 mahbusning qamoq muddati qisqartirilgan.

Biroq, Oliy sud vakili hozirda Afg'oniston qamoqxonalarida ayollarni ham qo'shgan holda qancha odam saqlanayotganini aytmadi.

Xalqaro inson huquqlari guruhlarining ta'kidlashicha, qiynoqlar Tolibon nazoratidagi qamoqxonalarda, ayniqsa razvedka boshqarmalari tomonidan boshqariladigan qamoqxonalarda keng tarqalgan amaliyotdir.

Ularning so'zlariga ko'ra, qiynoq qurbonlari shikoyat qilish va o'z xavfsizligini ta'minlashning samarali mexanizmlariga ega emaslar. Qiynoq natijasida mahbuslarning o'limi holatlari ham qayd etilgan.

Nodavlat inson huquqlari tashkilotlari tomonidan o'tkazilgan tekshiruvlarga ko'ra, markaziy va viloyat razvedka boshqarmalarida gumondorlarga nisbatan 31 xil qiynoq qo'llaniladi.

O'z navbatida, Tolibon vakili Zabihulla Mujohid afg'on diasporasi ommaviy axborot vositalariga bergan maxsus intervyusida mahbuslarga nisbatan qiynoqqa solish haqidagi xabarlarni qat'iyan rad etdi. Uning ta'kidlashicha, harakat tamoyillariga ko'ra, gumondorlarga nisbatan har qanday zo'ravonlik yoki haqorat taqiqlangan.

Surat: Pazhwok yangiliklari