Бишкек, 2026-жылдын 31-августу – Karavan Info маалымат агенттиги. Кыргыз Республикасынын Президенти Садыр Жапаров бүгүн, 31-августта, VI Дүйнөлүк көчмөндөр оюндарынын ачылыш аземине жана ШКУ+ жолугушуусуна катышуу үчүн Кыргызстанга келген Лаос Элдик Демократиялык Республикасынын Президенти Тонглун Сисулит менен жолугушту.

Жолугушуунун жүрүшүндө мамлекет башчылары кыргыз-лаос мамилелерин андан ары өнүктүрүү үчүн байланыштын өзгөчө маанисин белгилешти.

Садыр Жапаров азыркы жолугушуу өзгөчө тарыхый мааниге ээ экенин, анткени бул эки мамлекеттин ортосунда дипломатиялык мамилелер орнотулгандан берки Кыргыз Республикасы менен Лаос Элдик Демократиялык Республикасынын жетекчилеринин ортосундагы биринчи жолугушуу экенин баса белгиледи.

Мамлекет башчысы белгилегендей, Түштүк-Чыгыш Азия мамлекеттери менен байланыштарды чыңдоо Кыргыз Республикасынын тышкы саясатынын маанилүү багыттарынын бири болуп саналат.

Буга байланыштуу Садыр Жапаров Кыргызстандын Лаос Элдик Демократиялык Республикасы менен эки тараптуу деңгээлде да, эл аралык жана аймактык уюмдардын алкагында да кызматташууну андан ары өнүктүрүүгө жана бекемдөөгө кызыкдар экенин билдирди.

Тараптар ар кандай деңгээлдерде үзгүлтүксүз байланыштарды сактоого жана кыргыз-лаос кызматташтыгынын бекем пайдубалын түзүү үчүн биргелешкен аракеттерди көрүүгө даяр экендиктерин билдиришти.

Сүрөт: Кыргыз Республикасынын Президентинин Администрациясы