Бишкек, 2026-жылдын 7-сентябры – Karavan Info маалымат агенттиги. Министрлер кабинетинин төрагасы Адылбек Касымалиев Россия Федерациясынын Татарстан Республикасынын башчысы Рустам Минниханов менен жолугушту. Бул тууралуу Кыргыз Республикасынын Министрлер кабинетинин басма сөз кызматы билдирди.

Жолугушууда Адылбек Касымалиев Рустам Миннихановдун VI Дүйнөлүк көчмөндөр оюндарынын алкагында өтүп жаткан Кыргызстанга болгон сапарынын символикалуулугун белгиледи.

Адылбек Касымалиев Кыргызстан Татарстанга ар тараптуу колдоо көрсөтүүгө жана Дүйнөлүк көчмөндөр оюндарын даярдоо жана өткөрүү учурунда топтолгон тажрыйба менен бөлүшүүгө даяр экенин билдирди.

Тараптар эки тараптуу соода-экономикалык жана маданий кызматташтыкты талкуулашты. Алар өз ара ишкердик сапарларды улантуунун, бизнес өкүлдөрүнүн ортосундагы түз байланыштарды чыңдоонун жана келечектүү инвестициялык демилгелерди биргелешип алга жылдыруунун маанилүүлүгүн белгилешти.

Жолугушуунун жүрүшүндө тараптар биологиялык ар түрдүүлүктү сактоо боюнча биргелешкен демилгелерди да талкуулап, айлана-чөйрөнү коргоо жаатында активдүү кызматташууну улантууга макулдашышты.

Мындан тышкары, билим берүү, маданият, илим, жаштар саясаты жана спорт тармактарындагы кызматташтыкты кеңейтүүнүн маанилүүлүгү белгиленди.

Бул багыттардагы кызматташтыкты өнүктүрүү эки элдин ортосундагы салттуу достук байланыштарды жана өз ара ишенимди андан ары чыңдоого өбөлгө түзөрү баса белгиленди.

Сүрөт: Кыргыз Республикасынын Министрлер Кабинети