Астана, 2026 жылғы 11 қыркүйек – Karavan Info ақпараттық агенттігі. Астанада Қазақстан мен Өзбекстан арасындағы бірлескен туристік форум «Өзбекстан мен Қазақстан: стратегиялық серіктестік және жаңа туристік хабтарды дамыту» өтті. Іс-шараға екі елдің мемлекеттік органдарының, туристік компаниялардың, әуе тасымалдаушыларының, қонақ үй индустриясының және БАҚ-тың шамамен 300 өкілі қатысты.
2025 жылдың соңына қарай Өзбекстаннан Қазақстанға келген туристер саны шамамен 5,6 миллионға бағаланды. Өзбекстанға шамамен 2,9 миллион қазақстандық келді. Бұл өсім көлік логистикасының кеңеюімен және Алматы, Ташкент, Самарқанд, Атырау, Орал, Қостанай және Үргеніш қалалары арасында жаңа рейстердің ашылуымен байланысты.
Пленарлық отырысты Өзбекстанның Қазақстандағы елшісі Бахтиёр Ибрагимов, ҚР туризм және спорт вице-министрі Мирас Төлебаев және көлік вице-министрі Талғат Ластаев ашты.
«Бүгінде халықаралық туристер бір сапарда тек бір елді ғана емес, тұтас аймақты көргісі келеді. Сондықтан біз үшін Қазақстан мен Өзбекстанды Орталық Азия бойынша бірыңғай саяхаттың бөлігі ретінде бірлесіп насихаттау маңызды. Біздің мақсатымыз — осы артықшылықтарды нақты туристік өнімдерге, ыңғайлы бағыттарға және әлемдік нарықтағы күшті ұсынысқа айналдыру», — деді Мирас Төлебаев.
Бірлескен жұмыстың басым бағыттарының қатарында ол Ұлы Жібек жолы бойымен шекарааралық бағыттарды құруды, көлік интеграциясын және шекара мен виза рәсімдерін жеңілдетуді атады.
Фото : Қазақстан Республикасы Туризм және спорт министрлігі