Душанбе, 24 сентябр, – АИ «Корвон Иттилоот». Президенти Ҷумҳурии Тоҷикистон, Пешвои миллат Эмомалӣ Раҳмон 23 сентябр дар шаҳри Хуҷанд бо роҳбарон ва фаъолони вилояти Суғд мулоқот анҷом дод.
Дар ҷараёни вохӯрӣ натиҷаҳои рушди иҷтимоию иқтисодии минтақа баррасӣ гардида, самтҳои афзалиятноки минбаъда дар соҳаҳои саноат, энергетика, нақлиёт, маориф ва тандурустӣ муайян карда шуданд.
Дар оғози суханронӣ Президент сокинони вилояти Суғдро ба муносибати 35-солагии Истиқлоли давлатии Ҷумҳурии Тоҷикистон табрик намуд. Ба гуфтаи ӯ, дар арафаи таҷлили ин санаи муҳим дар шаҳру ноҳияҳои вилояти Суғд 15 ҳазору 400 иншооти иҷтимоӣ ва истеҳсолӣ бунёд ва таҷдид карда шудаанд.
Дар ҷараёни сафари кории Сарвари давлат ба минтақа ба сохтмон ва ба истифода додани корхонаҳои нави истеҳсолӣ ва иншооти иҷтимоӣ таваҷҷуҳи махсус зоҳир гардид.
Танҳо дар се рӯзи охир дар шаҳру ноҳияҳои вилоят 43 иншооти нави истеҳсолӣ ва иҷтимоӣ ба истифода дода шуданд, ки дар миёни онҳо корхонаҳои бузурги саноатӣ дар шаҳрҳои Истаравшан ва Гулистон, муассисаҳои таълимӣ ва тиббӣ, инчунин иншооти соҳаи хизматрасонӣ қарор доранд. Дар ин иншоот ҳазорҳо ҷойи нави корӣ таъсис дода шудааст.
Эмомалӣ Раҳмон таъкид намуд, ки дар солҳои истиқлолият аз ҳисоби буҷети давлатӣ барои татбиқи барномаҳои иҷтимоию иқтисодии вилояти Суғд, рушди ҳамаҷонибаи он ва беҳтар намудани шароити зиндагии аҳолӣ зиёда аз 40 миллиард сомонӣ равона гардидааст.
Дар ҳудуди вилоят беш аз 100 лоиҳаи давлатии сармоягузорӣ ба маблағи 11 миллиард сомонӣ амалӣ шуда, айни замон татбиқи боз 24 лоиҳаи дигар идома дорад.
Яке аз самтҳои асосии мулоқот рушди саноат буд. Танҳо дар панҷ соли охир дар вилоят 781 корхонаи нави саноатӣ сохта ва ба истифода дода шудааст, ки дар онҳо зиёда аз 8 ҳазор ҷойи нави корӣ таъсис ёфтааст.
Ҳамзамон, Президент зарурати гузариш аз истеҳсол ва содироти ашёи хом ба коркарди амиқи он, афзоиши истеҳсоли маҳсулоти тайёр ва истифодаи пурраи иқтидори содиротии корхонаҳои ватаниро таъкид намуд.
Дар соҳаи энергетика сохтмони хати интиқоли барқи «Ҷануб — Шимол» бо шиддати 500 киловолт ва дарозии 264 километр, инчунин зеристгоҳҳои «Душанбе — 500» ва «Суғд — 500» ҳамчун намунаи муҳими татбиқи лоиҳаҳои инфрасохторӣ дар самти расидан ба истиқлоли комили энергетикӣ арзёбӣ гардид.
Арзиши умумии ин иншоот 2,8 миллиард сомонӣ-ро ташкил медиҳад. Дар баробари ин, таъкид гардид, ки истифодаи самараноки иқтидорҳои энергетикӣ, ҷорӣ намудани технологияҳои муосир ва коҳиш додани талафоти неруи барқ бояд пайваста дар маркази таваҷҷуҳ қарор дошта бошад.
Ҳамзамон, дар вилояти Суғд дар соҳаи нақлиёт 13 лоиҳаи давлатии сармоягузорӣ ба маблағи зиёда аз 6,1 миллиард сомонӣ амалӣ карда шудааст. Дар доираи ин лоиҳаҳо 568 километр роҳҳои дорои аҳамияти байналмилалӣ, 90 пул ва 11,7 километр нақбҳо сохта ва ба истифода дода шудаанд.
Сарвари давлат ба роҳбарони масъул супориш дод, ки минбаъд низ ба нигоҳдории роҳҳо, истифодаи самараноки онҳо ва баланд бардоштани сифати инфрасохтори нақлиётӣ таваҷҷуҳи доимӣ зоҳир намоянд.
Бахши муҳими мулоқот ба масъалаҳои иҷтимоӣ бахшида шуд. Дар солҳои истиқлолият дар шаҳру ноҳияҳои вилояти Суғд 986 муассисаи таълимӣ бо арзиши умумии 1,4 миллиард сомонӣ сохта ва ба истифода дода шудааст. Ин муассисаҳо барои таҳсили 470 ҳазор хонанда пешбинӣ шудаанд.
Дар ин давра инчунин бо мақсади баланд бардоштани сифати хизматрасонии тиббӣ дар шаҳру ноҳияҳои вилоят 417 иншооти соҳаи тандурустӣ бунёд ва ба истифода дода шудааст.
Ба роҳбарони соҳа супориш дода шуд, ки барои бо таҷҳизоти муосир таъмин намудани муассисаҳои тандурустӣ, рушди тибби рақамӣ, баланд бардоштани сатҳи касбии кормандони соҳа ва минбаъд такмил додани хизматрасонии тиббӣ ба аҳолӣ чораҳои иловагӣ андешанд.
Дар фарҷоми мулоқот Президент изҳори итминон намуд, ки сокинони меҳнатдӯст ва созандаи вилояти Суғд минбаъд низ бо иродаи қавӣ ва меҳнати созандаи худ дар рушди кишвар ва ҳифзи дастовардҳои даврони истиқлол саҳми арзанда мегузоранд.
Дар мулоқот инчунин донишҷӯ Азиза Ҷумазода, соҳибкор Исроилхӯҷа Самандаров ва собиқадори меҳнат, вакили собиқи Иҷлосияи XVI Шӯрои Олии Ҷумҳурии Тоҷикистон Гулафзо Савриддинова суханронӣ карданд. Онҳо ба масъалаҳои фароҳам овардани шароити муносиб барои зиндагӣ ва таҳсил, дастгирии соҳибкорӣ ва дастовардҳои иҷтимоию иқтисодии даврони истиқлол таваҷҷуҳ зоҳир намуданд.
АКС: Хадамоти Президенти Ҷумҳурии Тоҷикистон