Душанбе, 25 сентябр, – АИ «Корвон Иттилоот». Театри давлатии академии опера ва балети Тоҷикистон ба номи Садриддин Айни мавсими 89-уми театриашро бо намоиши яке аз маъруфтарин операҳои репертуари ҷаҳонӣ — «Травиата»-и Ҷузеппе Верди оғоз мекунад. Намоиши опера 3 октябр, соати 18:00 баргузор шуда, ба забони итолиёвӣ — забони аслии асар — пешкаши тамошобинон мегардад.

Опера бар асоси романи Александр Дюма-писар «Бонуи камелиёдор» офарида шудааст. Дар маркази сюжети он саргузашти ишқи Виолетта Валери ва Алфред Жермон қарор дорад, ки бо таассуботи иҷтимоӣ ва шароити зиндагӣ рӯ ба рӯ мешавад. Мавзӯъҳои ишқ, фидокорӣ ва интихоби инсонӣ дар тӯли қариб якуним аср аҳамияти худро нигоҳ дошта, «Травиата»-ро дар репертуари операи ҷаҳонӣ мавқеи устувор бахшидаанд.

Яке аз вижагиҳои намоиши нав иштироки сарояндаи даъватшуда аз Ҷумҳурии Чехия Либуше Санторисова хоҳад буд, ки нақши Виолетта Валериро иҷро мекунад. Нақши Алфред Жермонро Манучеҳр Раҳмонов, Жорж Жермонро Ҳунарпешаи шоистаи Ҷумҳурии Тоҷикистон Содиқ Нуруллоев ва Флора Бевуаро Ҳунарпешаи шоистаи Ҷумҳурии Тоҷикистон Шарофат Усмонзода иҷро мекунанд.

Дар дигар нақшҳо Амонуллои Нурулло (Гастон), Ҳаётҷон Ҳамроҳонов (Барон Дюфол), Сафарлӣ Солеҳов (Маркиз д’Обинӣ), Комрон Содиқов (Доктор Гренвил), Мария Мирзоева (Аннина) ва Ҷамшед Саидов (Комиссар) ҳунарнамоӣ мекунанд.

Бар рӯи таҳияи намоиш гурӯҳи эҷодии театр кор кардааст. Режиссёри таҳиягар Суҳроб Усмонов ва рассоми таҳиягар Ҷамшед Холиқов мебошанд. Мусиқии намоишро оркестри симфонӣ таҳти роҳбарии дирижёр Анвар Шоймуродов иҷро мекунад.

Дар спектакл ҳамчунин хори академӣ таҳти роҳбарии хормейстер Шарифбек Баротов ва гурӯҳи балет таҳти роҳбарии балетмейстери таҳиягар, Ҳунарпешаи шоистаи Ҷумҳурии Тоҷикистон Александр Бахман иштирок мекунанд.

Интихоби «Травиата» барои оғози мавсими нав ҳузури доимии репертуари классикии операро дар барномаи эҷодии театр таъкид менамояд. Иштироки сарояндаи хориҷӣ дар таҳияи намоиш инчунин имкони ҳамкории касбии ҳунармандони кишварҳои гуногунро фароҳам меорад.

Мавсими 89-уми театр 3 октябр бо намоиши «Травиата» оғоз гардида, идомаи фаъолияти бисёрсолаи театр дар самти ҳифз ва муаррифии осори классикии операи ҷаҳонӣ ба тамошобинони Тоҷикистон хоҳад буд.

АКС: Хадамоти матбуоти Театри давлатии академии опера ва балети Тоҷикистон ба номи С. Айни.