Душанбе, 25 сентябр, – АИ «Корвон Иттилоот». Дар шаҳри Душанбе Форуми байналмилалии Душанбе таҳти унвони «Ҳамгироии шаҳрҳо дар татбиқи имкониятҳои сайёҳии устувор» ва Намоишгоҳи байналмилалии сайёҳии Душанбе — 2026 баргузор шуда истодааст.

Чорабинӣ намояндагони зиёда аз 15 кишвари ҷаҳон, сохторҳои давлатӣ ва шаҳрӣ, корпуси дипломатӣ, созмонҳои байналмилалӣ ва бахши сайёҳиро барои баррасии шаклҳои нави ҳамкорӣ дар соҳаи сайёҳии шаҳрӣ ба ҳам овардааст.

Форум ва намоишгоҳ дар Муассисаи давлатии «Китобхонаи милли»-и Дастгоҳи иҷроияи Президенти Ҷумҳурии Тоҷикистон баргузор мешаванд. Дар кори форум намояндаи Ҳукумати Ҷумҳурии Тоҷикистон, роҳбарияти вазорату кумитаҳо, намояндагони корпуси дипломатӣ ва созмонҳои байналмилалии муқими Душанбе, намояндаи Федератсияи умумиҷаҳонии шаҳрҳои туристӣ, раисони шаҳрҳо ва роҳбарони сохторҳои шаҳрӣ, инчунин субъектҳои хизматрасонии сайёҳӣ иштирок доранд.

Форумро муовини якуми Раиси шаҳри Душанбе Бахтиёр Шарифӣ ифтитоҳ намуда, таъкид кард, ки рушди сайёҳӣ яке аз самтҳои муҳими ҳамкории шаҳрҳо ба ҳисоб меравад. Ба гуфтаи ӯ, истифодаи имкониятҳои сайёҳии шаҳрӣ метавонад ба таҳкими робитаҳои иқтисодӣ, фарҳангӣ ва иҷтимоӣ миёни кишварҳо мусоидат намояд.

Дар ҷараёни форум масъалаҳои рушди устувори сайёҳӣ, таҳкими ҳамкории байни шаҳрҳо, истифодаи самараноки имкониятҳои сайёҳии шаҳрӣ, ҷалби сармоягузорӣ ба соҳа ва баланд бардоштани сифати хизматрасониҳои сайёҳӣ мавриди баррасӣ қарор мегиранд.

Ҳамзамон, дар доираи намоишгоҳ имкониятҳои сайёҳии Тоҷикистон ва маҳсулоти сайёҳии ватанӣ муаррифӣ шуда, барои ба роҳ мондани робитаҳои нави корӣ миёни шаҳрҳо, ширкатҳои сайёҳӣ ва дигар иштирокчиёни соҳа шароити мусоид фароҳам оварда мешавад.

Баргузории форум ва намоишгоҳ имкон медиҳад, ки сайёҳии шаҳрӣ на танҳо ҳамчун самти рушди хизматрасониҳо, балки ҳамчун василаи густариши ҳамкориҳои иқтисодӣ ва фарҳангӣ миёни шаҳрҳо баррасӣ гардад. Табодули таҷриба, муаррифии маҳсулоти сайёҳӣ ва ҷустуҷӯи шаклҳои нави шарикӣ метавонанд ба муаррифии васеътар ва рушди минбаъдаи имкониятҳои сайёҳии Тоҷикистон дар сатҳи байналмилалӣ мусоидат намоянд.

Форуми байналмилалии Душанбе таҳти унвони «Ҳамгироии шаҳрҳо дар татбиқи имкониятҳои сайёҳии устувор» ва Намоишгоҳи байналмилалии сайёҳии Душанбе — 2026 то 26 сентябр идома хоҳанд кард.

АКС: «Садои Душанбе»