Душанбе, 30 сентябр, – АИ «Корвон Иттилоот». Дар Душанбе ҷаласаи гурӯҳи кории техникӣ баргузор гардид, ки ба идомаи татбиқи лоиҳаи ҷалби ҷавонони хоҷагиҳои фермерии хурд ба технологияҳои муосири кишоварзӣ бахшида шуд.
Иштирокчиён рафти иҷрои чорабиниҳои ба нақша гирифташуда, рушди лоиҳа дар Вилояти Мухтори Кӯҳистони Бадахшон, омодагӣ ба Конференсияи миллӣ ва Намоишгоҳи технологияҳои рақамӣ дар соҳаи кишоварзӣ Digital AgriExpo Tajikistan-2026, инчунин қадамҳои минбаъда барои густариши ҳамкорӣ миёни сохторҳои давлатӣ, муассисаҳои илмию таълимӣ, ташкилотҳои байналмилалӣ ва ҷамъиятӣ ва бахши хусусиро баррасӣ намуданд.
Ҷаласа 28 сентябри соли 2026 дар бинои КВД «Маркази рақамикунонӣ, инноватсия ва такмили ихтисоси кадрҳои соҳаи кишоварзӣ»-и Вазорати кишоварзии Ҷумҳурии Тоҷикистон баргузор гардид.
Дар кори гурӯҳи кории техникӣ намояндагони масъули Вазорати кишоварзии Ҷумҳурии Тоҷикистон, вазорату идораҳои дахлдор, Маркази рақамикунонӣ, инноватсия ва такмили ихтисоси кадрҳои соҳаи кишоварзӣ, Академияи илмҳои кишоварзии Тоҷикистон ва Донишгоҳи аграрии Тоҷикистон ба номи Ш. Шоҳтемур иштирок намуданд.
Ҳамчунин намояндагони Барномаи озуқавории ҷаҳонӣ дар Тоҷикистон (WFP), Агентии Корея оид ба ҳамкориҳои байналмилалӣ дар Тоҷикистон (KOICA), ташкилоти «Каритас», кооперативи «Сароб», ташкилоти ҷамъиятии «Пешсаф», ташкилотҳои «Агроолам», «Ҷовид», ташкилоти Олмон «WHH», ташкилоти ҷамъиятии хайриявии «Ҳунар ва шукуфоӣ», ташкилоти «GNT» ва дигар намояндагони бахши хусусӣ дар муҳокимаҳо иштирок карданд.
Дар маркази рӯзномаи ҷаласа лоиҳаи «Ҷалб намудани ҷавонони хоҷагиҳои фермерии хурд тавассути истифода намудани технологияи кишоварзӣ барои беҳтар намудани амнияти озуқаворӣ ва занҷираҳои арзиши маҳсулот» қарор дошт.
Яке аз самтҳои асосии муҳокима ба татбиқи лоиҳа дар ВМКБ бахшида шуд. Ба иштирокчиён оид ба интихоби майдончаҳои намоишӣ, бунёди онҳо ва рафти баргузории омӯзишҳо маълумот пешниҳод гардид. Қисмати амалии лоиҳа фароҳам овардани шароитеро дар назар дорад, ки намояндагони ҷавони хоҷагиҳои фермерии хурд тавонанд бо технологияҳои муосири кишоварзӣ шинос шуда, дар раванди омӯзиш ва фаъолияти амалӣ донишҳои заруриро аз худ намоянд.
Ҳамзамон консепсия ва барномаи Конференсияи миллӣ ва Намоишгоҳи технологияҳои рақамӣ дар соҳаи кишоварзӣ Digital AgriExpo Tajikistan-2026 муаррифӣ гардид. Дар доираи омодагӣ ба ин чорабинӣ иштирокчиён имкониятҳои муаррифии роҳҳалҳои муосири рақамӣ, табодули таҷриба ва густариши ҳамкории намояндагони бахши давлатӣ, илму маориф, ташкилотҳои байналмилалӣ, соҳибкорӣ ва истеҳсолкунандагони маҳсулоти кишоварзиро баррасӣ карданд.
Дар ҷаласа инчунин тағйиру иловаҳои марбут ба баргузории «Лагери инноватсионӣ», рафти татбиқи чорабиниҳои лоиҳа ва масъалаҳои мубрами фаъолияти минбаъда мавриди муҳокима қарор гирифтанд.
Самти дигари ҷаласа ба муаррифии платформаи омӯзишии рақамии eagronom.tj бахшида шуд. Истифодаи чунин воситаҳо барои паҳн намудани донишҳои касбӣ ва иттилооти амалӣ дар байни кормандони соҳаи кишоварзӣ имкониятҳои иловагӣ фароҳам меорад.
Роҳҳалҳои рақамии омӯзишӣ метавонанд барои баланд бардоштани дастрасӣ ба таҳсил, бахусус дар минтақаҳои деҳот, ва мубодилаи саривақтии донишҳо оид ба усулҳои муосири кишоварзӣ мусоидат намоянд.
Зимни нишаст ҳамчунин масъалаҳои мубрами татбиқи лоиҳа, иҷрои фаъолиятҳои ба нақша гирифташуда ва натиҷаҳои фаъолияти шарикони рушд муҳокима гардиданд. Чунин формати ҳамкорӣ имкон медиҳад, ки натиҷаҳои бадастомада бо вазифаҳои гузошташуда муқоиса гардида, самтҳое, ки ҳамоҳангсозии иловагиро талаб мекунанд, сари вақт муайян карда шаванд.
Дар қисмати ҷамъбастии ҷаласа аъзои гурӯҳи кории техникӣ нуқтаҳои асосии амалҳои минбаъдаро мувофиқа намуда, нақшаи баргузории ҷаласаи навбатӣ ва қадамҳои минбаъда ҷиҳати густариши ҳамкориҳоро муайян карданд.
Ҷаласаи гурӯҳи кории техникӣ дар фазои созанда ва бо мубодилаи озоди афкор баргузор гардид. Дар ҷамъбаст натиҷаҳои муҳокимаҳо, қарорҳои қабулшуда, масъалаҳои амалии марҳилаи навбатӣ ва қадамҳои минбаъдаи зарурӣ барои татбиқи самараноки чорабиниҳои пешбинишуда мавриди баррасӣ ва мувофиқа қарор гирифтанд.
Дар маҷмӯъ, самтҳои баррасишуда нақши рӯзафзуни воситаҳои рақамиро дар рушди соҳаи кишоварзии Тоҷикистон инъикос мекунанд. Барои хоҷагиҳои фермерии хурд ҳамгироии омӯзиши амалӣ, майдончаҳои намоишӣ ва захираҳои рақамии таълимӣ метавонад механизмҳои иловагии дастрасӣ ба дониш ва технологияҳои муосирро фароҳам оварда, ҳамзамон рушди иқтидори инсонӣ, баланд бардоштани самаранокии кишоварзӣ ва таҳкими амнияти озуқавориро ба ҳам пайванд диҳад.
АКС: Маркази рақамикунонӣ, инноватсия ва такмили ихтисоси кадрҳои соҳаи кишоварзӣ