Душанбе, 01 октябр — АИ «Корвон Иттилоот». Рӯзи 18 октябр дар шаҳри Душанбе Рӯзи синамои Қирғизистон баргузор мешавад, ки ба барномаи сеюмин Синамоҷашнвораи миллии «Душанбе: Тоҷи Сомон» ворид шудааст.
Ин чорабинӣ барои тамошобинон имкони шиносоӣ бо синамои муосири Қирғизистон фароҳам оварда, ҳамзамон ба таҳкими ҳамкориҳои фарҳангӣ ва эҷодӣ миёни ду кишвари ҳамсоя мусоидат хоҳад кард.
Тавре дар «Тоҷикфилм» иттилоъ додаанд, шоми синамои қирғиз 18 октябр дар толори синамои «Наврӯз» оғоз мегардад. Дар он намояндагони соҳаҳои синамои Тоҷикистон ва Қирғизистон, коргардонҳо, таҳиягарон, ҳунармандон ва дигар намояндагони фарҳангу ҳунар иштирок мекунанд.
Дар доираи Рӯзи синамои Қирғизистон ба тамошобинон се филми тозаи синамои муосири қирғиз пешниҳод карда мешавад.
Ба барномаи намоиш филмҳои зерин ворид шудаанд:
«Фармоиш» («Заказ») — коргардон Достон Мадалбеков;
«Мо ду нафар» («Экообуз») — коргардон Динмуҳаммад Орозбеков;
«Асир» («Туткун») — коргардон Темир Бирназаров.
Намоиши ин филмҳо ба тамошобинони тоҷик имкон медиҳад, ки бо равандҳои муосири рушди синамои қирғиз, равишҳои коргардонӣ ва мавзӯъҳои мубрами он шинос шаванд. Ҳузури намояндагони ду соҳаи миллии синамо дар як чорабинӣ ҳамзамон барои муоширати касбӣ миёни коргардонҳо, таҳиягарон, ҳунармандон ва дигар намояндагони соҳа замина фароҳам меорад.
Баргузории Рӯзи синамои Қирғизистон дар доираи синамоҷашнвораи миллӣ нақши синаморо ҳамчун яке аз воситаҳои муҳими муколамаи фарҳангӣ таъкид мекунад. Барои Тоҷикистон ва Қирғизистон, ки онҳоро таърихи муштараки минтақа ва робитаҳои фарҳангӣ ба ҳам мепайвандад, чунин ташаббусҳо барои мубодилаи таҷрибаи эҷодӣ ва густариши робитаҳои касбӣ имкониятҳои нав фароҳам месозанд.
Имсол сеюмин Синамоҷашнвораи миллии «Душанбе: Тоҷи Сомон» аз 15 то 19 октябр дар пойтахти Тоҷикистон баргузор мешавад. Ворид намудани Рӯзи синамои Қирғизистон ба барномаи ҷашнвора доираи ҷуғрофии асарҳои пешниҳодшавандаро васеъ намуда, ба тамошобинони тоҷик имконият медиҳад, ки бо эҷодиёти коргардонҳои муосири кишвари ҳамсоя шинос шаванд.
АКС: «Тоҷикфилм»