Бишкек, 2026-жылдын 8-октябры – Karavan Info маалымат агенттиги. Кыргызстандын Экономика жана соода министрлиги жана Дүйнөлүк банктын тобу альтернативдүү инвестициялар жаатында кызматташууну өнүктүрүшөт.

Тийиштүү келишимге 7-октябрда экономика жана соода министринин орун басары Медербек Туманов жана Дүйнөлүк банктын тобунун Кыргызстандагы кеңсесинин башчысы Хью Ридделл кол коюшту.

Тараптар жеке сектор, ишканалар, стартаптар жана инновациялык долбоорлор үчүн каражаттарды тартуунун жаңы механизмдерин иштеп чыгууну көздөп жатышат.

Кызматташтык пландарына альтернативдүү инвестициялар үчүн ченемдик укуктук базаны өркүндөтүү жана жаңы каржылоо инструменттерин практикалык колдонуу үчүн зарыл болгон эрежелерди иштеп чыгуу кирет.

Дүйнөлүк банктын тобу эксперттик жана техникалык колдоо көрсөтөт.

Ошондой эле тараптар өнөктөштөрдүн ресурстарын бириктирүү жана эл аралык капиталды тартуу механизмдерин иштеп чыгууну көздөп жатышат.

Долбоорлорду биргелешип каржылоого жана кызыкдар инвесторлордун катышуу шарттарына өзгөчө көңүл бурулат.

Сүрөт: Кыргызстандын Экономика жана соода министрлиги