Душанбе, 15 октябр, – АИ «Корвон Иттилоот». Дар доираи сафари корӣ ба шаҳру ноҳияҳои Вилояти Мухтори Кӯҳистони Бадахшон Раиси Маҷлиси миллии Маҷлиси Олии Ҷумҳурии Тоҷикистон, Президенти Федератсияи футболи Тоҷикистон, Раиси шаҳри Душанбе муҳтарам Рустам Эмомалӣ дар деҳаи Даштаки Ҷамоати деҳоти Қалъаи Хумби ноҳияи Дарвоз Академияи футболи ВМКБ-ро ба таври расмӣ ба истифода доданд.

Бунёди инфрасохтори варзишии мувофиқ ба меъёрҳои аврупоӣ ва ҷаҳонӣ дар минтақаҳои баландкӯҳи кишвар яке аз самтҳои асосии сиёсати давлатӣ ва фаъолити Федератсияи футболи Тоҷикистон мебошад. Падид омадани чунин Академия дар Дарвоз барои наврасони истеъдодноки минтақа ҷиҳати расидан ба сатҳи касбӣ, омодагии мунтазам ва ворид шудан ба дастаҳои пешқадами кишвар ва мунтахабҳои миллӣ имкониятҳои нав мекушояд.

Дар муҳлати рекордӣ ва бо сифати баланд сохта шудани чунин иншоот аҳамияти стратеги доштани рушди минтақаҳо ва тарғиби тарзи ҳаёти солимро миёни наслҳои ҷавон ба таври равшан нишон медиҳад.

Маҷмааи варзишӣ мутобиқи талаботи сахттарини байналмилалӣ сохта шуда, барои давраи пурраи машқу табодули таҷриба ва истироҳат комилан муҷаҳҳаз гардидааст:

• Масоҳати умумии маҷмаа: 7800 метри мураббаъ.

• Бинои маъмуриву истиқоматӣ: Бинои дуошёна дорои хонаҳои истиқоматии бароҳат барои тарбиягирандагон, толори машваратӣ, утоқҳои корӣ, толори варзишӣ, ҳуҷраҳои либосивазкунӣ, ҳаммом ва ошхона барои 40 нафар мебошад.

• Майдони варзишӣ: Майдони футболи академия дорои 2000 ҷойи нишаст буда, пӯшиш ва нишондиҳандаҳои он ба талаботи Федератсияи байналмилалии футбол (ФИФА) пурра ҷавобгӯ мебошанд.

Аҳамияти вижа ба суръат ва сифати иҷрои ин лоиҳа зоҳир мегардад. Сохтмони Академия бо дастури бевоситаи Президенти ФФТ муҳтарам Рустам Эмомалӣ моҳи марти соли 2026 оғоз ёфта, моҳи сентябри ҳамин сол дар муҳлати муайяншуда бо сифати баланд ба анҷом расонида шуд.

Ба истифода додани Академияи футболи ВМКБ ба ҷалби васеи ҷавонон ба варзиш ва таҳкими пайвастаи футболи тоҷик такони ҷиддӣ хоҳад бахшид.

Акс: Мақомоти иҷроияи ҳокимияти давлатии шаҳри Душанбе.