Душанбе, 20 октябр, – АИ «Корвон Иттилоот». Дар Хадамоти алоқаи назди Ҳукумати Ҷумҳурии Тоҷикистон маросими расмии ифтитоҳи Деҳлези байналмилалии рақамии Тоҷикистон — Чин баргузор гардид. Пайвастшавии рамзии шабакаҳои ду кишвар дар ағбаи баландкӯҳи Кулма – Қаросу дар сарҳади Тоҷикистон ва Чин — дар баландии 4 363 метр аз сатҳи баҳр сурат гирифт.

Ҳуҷҷатҳои дахлдорро Директори генералии ҶСК «Тоҷиктелеком» Бахтовар Абдусатторзода ва роҳбари минтақаи Евро-Азияи China Mobile International Limited Лу Цзин ба имзо расонида, бо пахши тугмаи оғоз интиқоли ҷараёни маълумотро миёни Душанбе ва Пекин фаъол намуданд.

Оғози кори ин хати нави маҷрои байналмилалӣ марҳилаи таърихӣ дар татбиқи Стратегияи миллии рушди Тоҷикистон барои давраи то соли 2030 ва Стратегияи рушди соҳаи алоқа то соли 2040 мебошад. Ин лоиҳа Тоҷикистонро ба маркази муҳими транзити рақамии Осиёи Марказӣ ва қисми таркибии Шоҳроҳи рақамии абрешим табдил медиҳад.

Ифтитоҳи ин нуқтаи 5-уми байналмилалии алоқаи кишвар барои расидан ба ҳадафи стратегӣ — то 2 Тбит/с баланд бардоштани иқтидори умумии каналҳои алоқаи Тоҷикистон то соли 2030 замина мегузорад. Илова бар ин, мавҷудияти нерӯи барқи сабз ва арзон дар Тоҷикистон имкон медиҳад, ки марказҳои бузурги коркарди маълумот (ЦОД) барои соҳаи зеҳни сунъӣ сохта шаванд.

Дарозии хати нахи оптикие, ки Душанбе, Хорог ва Кулмаро пайваст мекунад, 1 010 километрро ташкил медиҳад, ки 435 километри он аз пайраҳаҳои мураккаби баландкӯҳи Бадахшон мегузарад. Аз тарафи Чин дарозии хати алоқа то сарҳад қариб 6 100 километрро ташкил медиҳад.

Ифтитоҳи ин деҳлез заминаи мустаҳкамро барои гузариш ба иқтисоди рақамӣ, ҷалби сармоя ва рушди устувори тамоми минтақаҳои кишвар, аз ҷумла Вилояти Мухтори Кӯҳистони Бадахшон фароҳам меорад.

Акс: Маркази матбуоти Хадамоти алоқаи назди Ҳукумати ҶТ / ҶСК «Тоҷиктелеком».