Душанбе, 23 октябр, – АИ «Корвон Иттилоот». То соли 2030 Ҷумҳурии Тоҷикистон таҳти роҳбарии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба яке аз марказҳои пешсафи металлургияи ранга дар минтақаи Осиёи Марказӣ табдил хоҳад ёфт.

Ин ҳадафи стратегӣ тавассути гузариш аз содироти ашёи хом ба истеҳсоли маҳсулоти дорои арзиши баланди иловашуда амалӣ мегардад.

Таъсиси Парки саноатии металлургияи ранга дар Вилояти Суғд бо ҷалби сармояи Ҷумҳурии Халқии Чин пояи устувори ин таҳаввулоти бузург мебошад.

Таъсиси маҷмааи муттаҳидшуда дар доираи таҳкими ҳамкориҳои дуҷониба амалӣ шуда, ду майдони асосӣ — пойгоҳи кӯҳкорӣ ва бойгардонии Алтын-Топкан (301 гектар) ва минтақаи металлургии коркарди амиқ дар Истиқлол (679 гектар)-ро дар бар мегирад.

Тибқи нақшаҳои пешниҳодкардаи ширкат, ҳаҷми умумии сармоягузорӣ ба ин лоиҳа 800 миллион доллари ИМА-ро ташкил медиҳад. Дар доираи он татбиқи беш аз 20 лоиҳаи саноатӣ пешбинӣ шудааст, ки занҷираи ягонаи истеҳсолиро аз коркарди маъдан то баромади маҳсулоти тайёр таъмин мекунанд.

Пас аз ба истифода додани парки саноатӣ ва расидан ба нишондиҳандаҳои пешбинишуда:

• Арзиши маҳсулот: Ҳаҷми солонаи маҳсулоти истеҳсолшаванда метавонад ба 5 миллиард доллар расад.

• Андозҳо: Маблағҳои иловагии солонаи андоз ба бюджети давлатӣ тақрибан 100 миллион долларро ташкил медиҳанд.

• Ҷойҳои корӣ: Шумораи ҷойҳои нави корӣ барои сокинони маҳаллӣ аз 4 000 зиёд хоҳад шуд.

Дар баробари рушди иқтисодӣ, масъалаҳои ҳифзи муҳити зист дар маркази таваҷҷуҳ қарор доранд. Дар доираи лоиҳа бунёди иқтидорҳои барқароршавандаи энергия (панелҳои офтобӣ), истифодаи дубораи об ва технологияҳои каммасраф пешбинӣ шудааст.

Ин ташаббуси бузург идомаи мантиқии Аҳдномаи дӯстии абадӣ, ҳамсоягии нек ва ҳамкорӣ миёни Тоҷикистон ва Чин буда, барои рушди устувори саноати кишвар заминаи мустаҳкам мегузорад.

Акс: Вазорати саноат ва технологияҳои нави Ҷумҳурии Тоҷикистон/ Ширкати истихроҷи тиллои ҶДММ «Пакрут» дар Тоҷикистон (шаҳри Ваҳдат)