Душанбе, 4 ноябр, – АИ «Корвон Иттилоот». Дар заминаи Донишгоҳи славянии Русияву Тоҷикистон барномаи байналмилалии таълимии «Мактаби филологияи рус — 2026» ба кор оғоз кард. Дар он беш аз 100 омӯзгори забони русӣ ва донишҷӯёни муассисаҳои таҳсилоти олии Тоҷикистон, ки оянда омӯзгори ин забон хоҳанд шуд, аз минтақаҳои гуногуни кишвар иштирок доранд.

Лоиҳа аз ҷониби Агентии федералии ҳамкорӣ бо кишварҳои Иттиҳоди Давлатҳои Мустақил, ҳамватанони бурунмарзӣ ва ҳамкории байналмилалии башардӯстона (Россотрудничество) дар ҳамкорӣ бо Донишгоҳи давлатии забоншиносии Москва ва бо дастгирии Донишгоҳи славянии Россияву Тоҷикистон амалӣ мешавад.

Дар давоми ду рӯз иштирокчиён бо таҷрибаи мутахассисони пешбари соҳаи филология шинос шуда, усулҳои муосири таълимро меомӯзанд ва таҷрибаи касбии худро мубодила мекунанд. Барнома лексияҳои интерактивӣ, дарсҳои маҳорат, мизҳои мудаввар ва супоришҳои гурӯҳиро дар бар мегирад.

Таваҷҷуҳи махсус ба воситаҳои амалии таълим, захираҳои рақамӣ ва шаклҳои нави омӯзиши забони русӣ равона шудааст.

Зимни маросими ифтитоҳ роҳбари намояндагии Россотрудничество дар Тоҷикистон Андрей Патрушев аҳаммияти лоиҳаро барои рушди ҷомеаи касбии омӯзгорони забони русӣ таъкид кард. Ба гуфтаи ӯ, ҳадафи барнома на танҳо дастгирии таваҷҷуҳ ба забони русӣ, балки фароҳам овардани шароит барои такмили маҳорати касбии омӯзгорон, табодули таҷриба ва ҷорӣ намудани усулҳои муосири таълим мебошад.

Ӯ изҳор дошт, ки мактаби мазкур метавонад ба минбари пешниҳоди ғояҳо ва ташаббусҳои нав табдил ёфта, ба таҳкими робитаҳои башардӯстона ва таълимии Тоҷикистону Россия мусоидат кунад.

Баргузории чунин барномаҳо барои рушди ҳамкории муассисаҳои таълимии ду кишвар, такмили малакаи омӯзгорон ва навсозии равишҳои таълими забони русӣ дар Тоҷикистон аҳаммияти амалӣ дорад.

Акс: Донишгоҳи славянии Русияву Тоҷикистон