Қазақстанның денсаулық сақтау министрлігі Африканың кейбір елдерінде Марбург вирусының өршуіне азаматтардың назарын аударып, сақтық шараларын сақтауға шақырады. Марбург вирусы-жануарлардан адамға таралатын, содан кейін адамдар арасында таралуы мүмкін қауіпті жұқпалы ауру.

Аурудың негізгі белгілеріне жоғары температура, бас ауруы, бұлшықет ауруы, бөртпе, диарея және қан кету жатады. Өкінішке орай, Марбург вирусына қарсы нақты емдеу және вакцина әлі жоқ.

Осыған байланысты, денсаулық сақтау министрлігі Марбург вирусы бойынша эндемиялық елдерге сапар шегуді жоспарлап отырған қазақстандықтарға бірқатар алдын алу шараларын сақтауды ұсынады: ауру адамдармен және жабайы жануарлармен байланысқа түспеу, қолын мұқият жуып, тек қайнатылған су мен термиялық өңделген тағамды тұтыну.

Қазақстанға инфекцияның әкелінуін болдырмау үшін халықаралық әуежайларда санитарлық-карантиндік бақылау күшейтілді. Барлық келген жолаушылар термометриядан өтеді.

Денсаулық сақтау министрлігі азаматтарды сергек болуға және аурудың алғашқы белгілерінде дереу медициналық көмекке жүгінуге шақырады.

Фото: freepik.com