Қазақстан мен Кувейт инвестициялық ынтымақтастықты белсенді дамытуда. Бұған Сыртқы істер министрінің орынбасары Әлібек Қуантыров пен «Kazakh Invest «ҰК» АҚ Басқарушы директоры Азамат Қожановтың Кувейт инвестициялық компаниясының директорлар кеңесінің төрағасы Юсоф Мұхаммад Әл-Әлидің жақында кездесуі дәлел бола алады.

Кездесуде білім беру және денсаулық сақтау салаларына инвестиция салу мүмкіндіктеріне ерекше назар аударылды. Қазақстандық тарап қонаққа елдің инвестициялық ахуалы, мемлекеттік қолдау шаралары және аталған салалардағы нақты жобалар туралы ақпарат ұсынды.

Өз кезегінде Кувейт тарапы Қазақстанның әлеуметтік жобаларына инвестиция салуға терең қызығушылық танытты. Компания өкілдері білім беру мен денсаулық сақтау саласына инвестиция салу кез келген елдің ұзақ мерзімді дамуы үшін маңызды фактор болып табылатынын атап өтті.

Кездесу қорытындысы бойынша тараптар ынтымақтастықты жалғастыруға және перспективалы жобалар туралы ақпарат алмасуға келісті.

Фото: ҚР СІМ