Ekologiya vazirligi tasarrufidagi “Orolqum” milliy tabiat bog‘i xodimlari noyob qush — burgutning parvozini tasvirga tushirishga muvaffaq bo‘ldilar.

“Orolqum” milliy tabiat bog‘i Qoraqalpog‘iston Respublikasi Mo‘ynoq tumani hududida 2022-yil 4-martda tashkil etilgan. Bu yerda 25 turdagi hayvonlar yashaydi, ulardan to‘rttasi O‘zbekiston Qizil kitobiga kiritilgan. Burgut ana shunday noyob turlardan biri bo‘lib, uning dunyo bo‘yicha soni 3,5-15 ming donagacha kamayib ketgan. Uning bahorgi ko‘chishi fevral oyida boshlanib, aprelgacha davom etadi, kuzgi ko‘chishi esa oktyabr-dekabr oylarida kuzatiladi. Yosh qushlar ham aprel va may oylarida ko‘chib yuradi.

Bu tur O‘zbekiston Qizil kitobiga, Xalqaro tabiatni muhofaza qilish ittifoqining Qizil ro‘yxatiga va CITES konvensiyasining I Ilovasiga kiritilgan, bu esa uning zaif maqomini ta’kidlaydi.

Burgutlar sonining kamayishining asosiy sabablari cho‘l va chalacho‘llardagi qo‘riq yerlarning xo‘jalik maqsadlarida o‘zlashtirilishi, uyalarning buzilishi va elektr uzatish liniyalarida qushlarning nobud bo‘lishi hisoblanadi.