Xalqaro tabiatni muhofaza qilish ittifoqining (IUCN) yangilangan Qizil ro‘yxatida e’lon qilingan daraxtlarning birinchi global bahosi shuni ko‘rsatdiki, dunyodagi daraxtlarning 38 foizi yo‘qolib ketish xavfi ostida. Hozirgi vaqtda Qizil ro‘yxatga 166 061 ta o‘simlik va hayvon turlari kiritilgan bo‘lib, ulardan 46 337 turi yo‘qolib ketish xavfi ostida deb topilgan.

IUCN bosh direktori doktor Gretel Agilarning ta’kidlashicha, daraxtlar Yerda hayotni qo‘llab-quvvatlashda asosiy rol o‘ynaydi, chunki millionlab odamlar ularning mavjudligiga bog‘liq. Ular nafaqat tirikchilik manbalarini ta’minlaydi, balki uglerod va suv aylanishi, tuproqda ozuqa moddalarini ushlab turish va iqlimni tartibga solish kabi ekologik jarayonlarga ham ta’sir qiladi.

Shahar rivojlanishi va qishloq xo‘jaligi uchun daraxtlarni kesish, shuningdek, zararkunandalar va kasalliklar ularning yashashiga xavf soladigan orollardagi daraxtlar ayniqsa yuqori xavf ostida. Botanika bog‘lari konservatsiyasi xalqaro tashkiloti (Botanic Gardens Conservation International) xodimi doktor Malin Rivers boshchiligidagi Daraxtlarni global baholash ma’lumotlariga ko‘ra, dunyoning 192 ta davlatida yo‘qolib ketish xavfi ostida bo‘lgan daraxt turlari mavjud. Qizil ro‘yxatga jami 47 282 turdagi daraxtlar kiritilgan bo‘lib, ulardan 16 425 turi jiddiy yo‘qolib ketish xavfi ostida.

Daraxtlar ekotizimlarning asosi sifatida nafaqat ko‘plab o‘simlik, zamburug‘ va hayvon turlarini saqlab qolish uchun, balki insonning o‘zi uchun ham hal qiluvchi rol o‘ynaydi. TMXI Qizil ro‘yxatiga kiritilgan 5000 dan ortiq turdagi yog‘och qurilish uchun, 2000 dan ortiq turdagi yog‘och esa dori-darmon, oziq-ovqat va yoqilg‘i ishlab chiqarish uchun ishlatiladi.