Hukumat yashash sharoitlarini yaxshilashga muhtoj bo‘lgan fuqarolar uchun subsidiyalar berish to‘g‘risida qaror qabul qildi. Subsidiyalar “subsidyplatform.mf.uz” platformasi orqali ajratiladi.

Yangi qarorga muvofiq, endi kambag‘allikdan chiqish dasturida ishtirok etayotgan fuqarolar uy qurish, rekonstruksiya qilish yoki ta’mirlash uchun ipoteka krediti olishlari mumkin.

Ushbu qaror doirasida ipoteka kreditlari 120 million so‘mgacha bo‘lgan summada asosiy stavkasi 4% ga oshirilgan holda berilishi ko‘zda tutilgan. Kredit muddati 20 yilgacha bo‘ladi. Shuningdek, kredit summasining 15% ini tashkil etuvchi dastlabki to‘lovning bir qismi subsidiyalangan bo‘ladi. Birinchi besh yil davomida 12% dan oshgan foizlarni to‘lash uchun ham subsidiyalar beriladi.

Bundan tashqari, yashash sharoitlarini yaxshilashga muhtoj fuqarolar uchun kadastr pasportini rasmiylashtirish va mulk huquqlarini ro‘yxatdan o‘tkazish xarajatlari 50% ga kamaytirilishi qayd etilgan. Ushbu qaror ipoteka kreditini olish jarayonini osonlashtirish va fuqarolar uchun uyga bo‘lgan imkoniyatlarni yaxshilashga qaratilgan.