O‘zbekiston Kosmik agentligi suv omborlari to‘g‘onlarining siljishini kuzatish uchun kosmik monitoring tizimini joriy etmoqda. Hukumat qaroriga ko‘ra, endilikda to‘g‘onlarning zilzilabardoshlik holati doimiy radiolokatsion kosmik kuzatuv orqali nazorat qilinadi, bu esa to‘g‘onlarda yuzaga keladigan siljish va cho‘kishlarni kuzatishga imkon beradi.

Monitoring natijalari to‘g‘onlar holatini kuzatish uchun maxsus yaratilgan elektron platformada saqlanadi. Platformada to‘g‘onlarning joriy holati, zilzilabardoshligi va mumkin bo‘lgan xavf darajasi haqidagi ma’lumotlar yig‘iladi. Shuningdek, ushbu ma’lumotlarni o‘rganish va to‘g‘onlarning holatini nazorat qilish uchun maxsus komissiya tashkil etiladi.

Bunday monitoring to‘g‘onlarning mustahkamligini baholashda katta ahamiyatga ega, chunki ular zilzilalarga juda ta’sirchan hisoblanadi. Bunday choralar muammolarni oldindan aniqlash va favqulodda holatlarning oldini olish uchun imkoniyat yaratadi.