Қазақстан Сыртқы істер министрінің орынбасары Әлібек Бақаев Сингапурдың Қазақстандағы Елшісі Зулькифли Бахарудинмен кездесу өткізді.

Кездесу барысында тараптар Қазақстан Президенті Қасым-Жомарт Тоқаевтың осы жылдың мамыр айында Сингапурға жасаған сапарының нәтижелерін жоғары бағалады және қол жеткізілген уағдаластықтарды одан әрі іске асыруға дайын екендіктерін білдірді.

«Сингапур — Қазақстанның оңтүстік-шығыс Азиядағы негізгі серіктестерінің бірі,және біз сауда-экономикалық байланыстарды тереңдетуге бағытталғанбыз. Өткен жылы тауар айналымы 1,8 миллиард АҚШ долларын құрады және біз өзара сауданың сапасын арттыра отырып, осы көрсеткіштерді жақсарта алатынымызға сенімдіміз», — деп атап өтті А.Бақаев.

Сондай-ақ, инвестициялар және көлік логистикасы салаларындағы ынтымақтастықты дамыту жолдары талқыланды. Дипломаттар өңірлік және жаһандық күн тәртібіндегі өзекті мәселелер бойынша, сондай-ақ көпжақты құрылымдар аясындағы өзара іс-қимыл бойынша пікір алмасты.

Елші Зулькифли Бахарудин екіжақты қатынастарды дамытуға қосқан елеулі үлесі үшін Қазақстан Премьер-Министрінің орынбасары-Сыртқы істер министрі Мұрат Нұртілеу атынан алғыс хатпен марапатталды.

Фото: ҚР СІМ