Ar-Riyodda bo‘lib o‘tgan navbatdan tashqari arab-islom sammitidagi ishtiroki doirasida Shavkat Mirziyoyev Saudiya Arabistoni energetika vaziri, shahzoda Abdulaziz bin Salmon Ol Saud bilan uchrashdi. Suhbatning asosiy mavzusi qo‘shma investitsiya loyihalari va yashil energetika sohasidagi hamkorlikni kengaytirish masalalari bo‘ldi.

Prezident Saudiyaning “ACWA Power” kompaniyasining O‘zbekiston energetika sohasini modernizatsiya qilishdagi faol ishtiroki uchun alohida minnatdorchilik bildirdi. Mazkur kompaniya to‘g‘ridan-to‘g‘ri investitsiyalar kiritish va zamonaviy texnologiyalardan foydalanish orqali sohani rivojlantirishga salmoqli hissa qo‘shmoqda.

Uchrashuv davomida tomonlar O‘zbekiston hududida shamol va quyosh elektr stansiyalarini qurish bo‘yicha loyihalarni amalga oshirishni tezlashtirish hamda yashil vodorod ishlab chiqarish istiqbollarini ham muhokama qildilar. O‘zbekiston korxonalarining mahalliylashtirish darajasi va energiya samaradorligini oshirish uchun Saudiya Arabistoni kompaniyalari va mutaxassislarini jalb etish bo‘yicha kelishuvga erishildi.