Мемлекет басшысының Францияға мемлекеттік сапары барысында денсаулық сақтау саласында маңызды келісімдерге қол жеткізілді. Қазақстан мен Франция медициналық қызметтердің сапасын жақсарту, цифрландыру мен телемедицинаны дамыту, онкологиялық көмекті жетілдіру және инновациялық технологияларды енгізу сияқты бағыттарда белсенді ынтымақтасуды жоспарлап отыр.

Сапар аясында Қазақстан Республикасының денсаулық сақтау министрлігі мен Франция Республикасының денсаулық сақтау және медициналық көмекке қол жеткізу министрлігі арасында, сондай-ақ қазақстандық және француздық ұйымдар арасында ынтымақтастық туралы бірқатар меморандумдарға қол қойылды. Бұл құжаттар денсаулық сақтау және аурулардың алдын алу саласына инвестициялар тартуға бағытталған.

Медициналық көмектің сапасын арттыру және алғашқы медициналық-санитарлық көмекті дамыту мәселелеріне ерекше назар аударылды. Тараптар алғашқы медициналық-санитарлық көмекті дамыту жөніндегі елдер коалициясын құру мүмкіндігін талқылады.

Қазақстандық делегация Францияның жетекші медициналық мекемелеріне барып, француз компанияларымен және ұйымдарымен бірқатар кездесулер өткізді. Осы кездесулердің нәтижесінде Қазақстан халқы үшін медициналық көмектің сапасы мен қолжетімділігін арттыруға бағытталған бірлескен жобаларды іске асыру туралы уағдаластықтарға қол жеткізілді.

Фото: ҚР Денсаулық сақтау министрлігі