Dubayda bo‘lib o‘tgan Kimberli jarayonining 21-yillik yalpi majlisida O‘zbekiston xalqaro sertifikatlashtirish sxemasiga rasman qo‘shildi. Tadbirda O‘zbekiston Respublikasi Investitsiyalar, sanoat va savdo vazirligi, Davlat asillik darajasini belgilash inspeksiyasi va “O‘zbekzargarsanoati” uyushmasi vakillaridan iborat delegatsiya ishtirok etdi.

O‘zbekistonni to‘laqonli a’zo sifatida qabul qilish to‘g‘risidagi qaror joriy yilning oktyabr oyida mamlakatimizga tashrif buyurgan ekspert missiyasining ijobiy xulosasidan so‘ng qabul qilindi. Mutaxassislar Kimberli jarayonining minimal talablariga muvofiqligini yuqori baholadi.

Kimberli jarayoni mojaro zonalaridan qazib olingan olmoslarning noqonuniy aylanishini oldini olishga qaratilgan global tashabbusdir. Sertifikatlashtirish sxemasida ishtirok etish O‘zbekistonga nafaqat xalqaro imijni yaxshilash, balki milliy ishlab chiqaruvchilarni qo‘llab-quvvatlash, jahon hamkorlari bilan hamkorlikni yo‘lga qo‘yish, zamonaviy texnologiyalarni joriy etish va xorijiy investitsiyalarni jalb qilish imkonini beradi.