Toshkentda O‘zbekiston Respublikasi Oliy Majlisi Qonunchilik palatasining parlament saylovidan keyingi ilk yig‘ilishi bo‘lib o‘tdi. Tadbirda Shavkat Mirziyoyev ishtirok etdi. Majlisni Markaziy saylov komissiyasi raisi Zayniddin Nizomxo‘jayev ochib berdi, so‘ngra Davlat madhiyasi ijro etildi.

Deputatlar majlisning vaqtinchalik organlarini, jumladan Hisob komissiyasi va Ovoz berishning elektron tizimi ishini nazorat qiluvchi guruhni sayladilar. Kun tartibiga asosiy tashkiliy masalalar kiritildi. Siyosiy partiyalar vakillari kengashining taklifi bilan Qonunchilik palatasi Spikeri lavozimiga Nuriddin Ismoilov saylandi. Shuningdek, Spiker o‘rinbosarlari belgilandi, beshta partiya fraksiyasi ro‘yxatdan o‘tkazildi va o‘nta parlament qo‘mitasi tashkil etildi.

Prezident deputatlarni saylanganligi bilan qutlab, buni xalqning yuksak ishonchi namoyoni deb ta’kidladi. Davlat rahbari o‘z nutqida saylovlar ilk bor yangilangan Konstitutsiya va yangi aralash ovoz berish tizimi asosida o‘tkazilgani, natijada parlamentda yangilangan tarkib shakllanganini alohida qayd etdi.