Kelgusi yilda kambag‘allikni qisqartirish va aholini ijtimoiy himoya qilish uchun 500 milliard so‘m ajratiladi. Shuningdek, yangi yildan boshlab fuqarolarga 65 turdagi ijtimoiy xizmat va 50 ga yaqin imtiyozlardan foydalanish imkonini beradigan yagona “Ijtimoiy karta” tizimi joriy etiladi.

O‘zbekistonda kambag‘allikni qisqartirish va fuqarolarning ijtimoiy himoyasini yaxshilashga qaratilgan muhim dasturlar amalga oshirilmoqda. To‘rt yil oldin mamlakat aholisining deyarli to‘rtdan bir qismining daromadlari minimal darajaga yetmagan edi, ammo shu vaqt ichida qashshoqlik 11 foizga qisqardi. O‘tgan davr mobaynida 3,5 million kishi o‘z moddiy ahvolini yaxshilash imkoniyatiga ega bo‘ldi, kelgusi uch yilda esa kambag‘allik darajasini 7 foizgacha pasaytirish rejalashtirilmoqda.

Daromadini yoki sog‘lig‘ini yo‘qotishi oqibatida og‘ir turmush sharoitiga tushib qolgan fuqarolarni qo‘llab-quvvatlash hajmi oshiriladi. Shu munosabat bilan ‘Ijtimoiy sug‘urta to‘g‘risida‘gi Qonun qabul qilindi, u yordam kerak bo‘lganlarga qo‘shimcha ko‘mak beradi.