Navoiy viloyatining Tomdi tumanida joylashgan “Oqtov-Tomdi” davlat qo‘riqxonasida fototuzoq noyob turkman qaroqalining suv ichayotgan paytini qayd etdi. 

2022 yilda tashkil etilgan qo‘riqxona 40 ming gektar maydonni o‘z ichiga oladi. Bu yerda 14 tur sut emizuvchilar, 21 tur qushlar va olti tur sudraluvchilar yashaydi. Ularning 13 turi O‘zbekistonning Qizil kitobiga kiritilgan. 

O‘zbekiston Qizil kitobiga kiritilgan turkman qaroqali yo‘qolib borayotgan turlar qatoriga kiradi. Uning yashash joylari mozaik bo‘lib, Ustyurt platosi, Amudaryo quyi oqimi, Qizilqum cho‘li, shuningdek, Surxondaryo va Zarafshon daryolari bo‘yidagi tekisliklarni o‘z ichiga oladi. Bu tur, shuningdek, yo‘qolib borayotgan kenja tur maqomida CITES xalqaro konvensiyasi bilan himoya qilinadi.