O‘zbekiston Respublikasi Investitsiyalar, sanoat va savdo vaziri Laziz Qudratov Shveysariyaning O‘zbekistondagi elchixonasi tashkil etgan “Shveysariya kunlari 2024” ochilish marosimida qatnashdi. “Shveysariya: Sifat. Innovatsiyalar. Ishonchlilik” umumiy mavzusi ostida o‘tkazilayotgan tadbirlar ikki mamlakat o‘rtasidagi ishbilarmonlik aloqalarini rivojlantirish, shuningdek, madaniyat, san’at va ta’limni qo‘llab-quvvatlashga qaratilgan.

Toshkentda bu tadbir uchinchi bor o‘tkazilib, unda Shveysariyaning 30 dan ortiq kompaniyasi ishtirok etmoqda.

Qudratov o‘z tabrik so‘zida O‘zbekiston va Shveysariya o‘rtasidagi savdo-iqtisodiy aloqalar sezilarli darajada rivojlanganini ta’kidladi. So‘nggi besh yilda mamlakatlar o‘rtasidagi tovar aylanmasi ikki barobarga oshib, 2023-yilda 341 million dollarni tashkil etdi. O‘zbekistonda 100 dan ortiq Shveysariya kompaniyasi faoliyat yuritmoqda, mamlakatga kiritilgan investitsiyalar hajmi esa 1,4 milliard dollarga yetdi. Hamkorlik farmatsevtika, sog‘liqni saqlash, qayta tiklanuvchi energiya manbalari, qurilish, to‘qimachilik, qishloq xo‘jaligi va turizm kabi sohalarni qamrab olgan.

Qudratov Shveysariya kompaniyalariga savdo va sanoat hamkorligini kengaytirish uchun istiqbolli imkoniyatlar taqdim etilayotganini ta’kidladi. Bu imkoniyatlar yashil texnologiyalar, sog‘liqni saqlash va ta’lim sohasidagi innovatsiyalar, resurslarni barqaror boshqarish hamda ilg‘or moliyaviy texnologiyalarni joriy etish kabi sohalarni o‘z ichiga oladi. Vazir Investitsiyalar, sanoat va savdo vazirligi O‘zbekistondagi Shveysariya kompaniyalariga har tomonlama yordam ko‘rsatishga tayyor ekanligini bildirdi.