O‘zbekistonda davra suhbati bilan birga “Gender zo‘ravonlikka qarshi 16 kunlik faol harakatlar” global kampaniyasi yo‘lga qo‘yildi. Uchrashuv mavzusi ayollar va bolalarga nisbatan zo‘ravonlik holatlariga munosabat bildirish bo‘yicha milliy tajribaga bag‘ishlandi.

Tadbir BMTning Aholishunoslik jamg‘armasi (UNFPA) tomonidan Ijtimoiy himoya milliy agentligi (IHMA) bilan hamkorlikda va Buyuk Britaniya hukumati ko‘magida tashkil etildi.

Har yili 25-noyabr — Xalqaro xotin-qizlarga nisbatan zo‘ravonlikka barham berish kunidan 10-dekabr — Inson huquqlari kunigacha o‘tkaziladigan kampaniya inson huquqlarining eng jiddiy buzilishlaridan biri sifatida zo‘ravonlikka qarshi kurashga e’tiborni qaratadi.

Davra suhbatida davlat organlari, xalqaro tashkilotlar va fuqarolik jamiyati vakillari ishtirok etdi. Ishtirokchilar qonunchilikdagi yutuqlar, jabrlanganlarga ijtimoiy xizmatlarni kengaytirish, shuningdek, gender zo‘ravonlik ko‘lami bo‘yicha milliy tadqiqot o‘tkazish rejalari kabi muhim jihatlarni muhokama qildilar. Bu ma’lumotlar keyingi islohotlar uchun asos bo‘lib xizmat qiladi.

UNFPA vakili Nigina Abaszada o‘z nutqida birgalikdagi sa’y-harakatlarning muhimligini ta’kidladi. Uning aytishicha, ma’lumotlar va tajribaga asoslangan yondashuvlar yanada xavfsiz jamiyat yaratishga ko‘maklashadi. O‘zbekiston Prezidentining maslahatchisi va IHMA direktori Mansurbek Olloyorov ijtimoiy sohadagi joriy islohotlar barqaror o‘zgarishlar uchun mustahkam poydevor yaratayotganini qo‘shimcha qildi.

Shuningdek, ‘Bolalarni zo‘ravonlikning barcha shakllaridan himoya qilish to‘g‘risida»gi qonunning qabul qilinishi, xotin-qizlar va bolalarni himoya qilish tizimining rivojlanishi kabi yutuqlar e’lon qilindi. Ishtirokchilar idoralar o‘rtasidagi hamkorlik, mahalliy hamjamiyatlarni jalb etish va ijtimoiy yordamning ommabopligini ta’minlash muhimligini ta’kidladilar.

Tadbir barcha tomonlarning hamkorlikni davom ettirish niyatlarini tasdiqlash bilan yakunlandi.