Rossiya Federatsiyasida “O‘zbekiston madaniyati kunlari” tadbirlari bo‘lib o‘tdi. Ushbu tadbirlar doirasida O‘zbekiston delegatsiyasi S.A. Gerasimov nomidagi Butunrossiya davlat kinematografiya instituti (VGIK) rektori Vladimir Malishev bilan uchrashuvni amalga oshirdi.

Tadbir doirasida Rossiya Federatsiyasi madaniyat vaziri Olga Lyubimova va O‘zbekiston Respublikasi madaniyat vaziri Ozodbek Nazarbekov rahbarligida muzokaralar o‘tkazildi. Asosiy e’tibor ikki mamlakat o‘rtasidagi madaniyat va kino sohasidagi iqtisodiy hamkorlikka qaratildi. Hukumatlararo komissiyaning Madaniyat qo‘mitasi to‘rtinchi yig‘ilishida qo‘shma kino loyihalarini amalga oshirish rejalari muhokama qilindi.

Rossiya madaniyat vaziri ta’kidlaganidek, qo‘shma kino ishlab chiqarish bo‘yicha imzolangan bitim o‘zbek kinematografchilariga xalqaro miqyosga chiqish imkonini beruvchi muhim qadam bo‘ldi. U, shuningdek, tajriba almashish yosh iste’dodlar uchun yangi istiqbollar ochishini alohida ta’kidlab o‘tdi.

Muzokaralardan so‘ng delegatsiya a’zolari VGIKda o‘zbekistonlik talabalarning o‘quv jarayoni va ta’lim olish sharoitlari bilan tanishdilar.