Мәскеуде Ресей ІІМ мен Тәжікстан ІІМ біріккен алқасының отырысы өтті. Ресей ведомствосының баспасөз қызметі хабарлағандай, кездесу аясында Тәжікстан мен Ресейдің ішкі істер министрлері Рамазон Рахимзода мен Владимир Колокольцев екі ведомствоның 2025 жылға арналған жұмыс жоспарын бекітті.

Алқа барысында тараптар трансұлттық қылмысқа қарсы күресте, ақпарат алмасу бойынша өзара іс-қимыл мәселелерін және басқа да өзекті тақырыптарды қозғады.

«Біздің құқық қорғау саласындағы стратегиялық әріптестігімізді белсенді дамыту нәтижесінде қажетті нормативтік құқықтық база қалыптастырылды. Министрліктер басшылығы деңгейінде және бейінді бөлімшелер желісі бойынша тығыз байланыстар орнатылды. Өзекті ақпаратпен алмасу жолға қойылды, жедел-қызметтік міндеттерді бірлесіп шешудің айтарлықтай практикалық тәжірибесі жинақталды. Келісілген жедел-профилактикалық операциялар үнемі жүргізіледі. Кадрларды даярлау желісі бойынша өзара іс-қимыл жалғасуда. Бүгінде Ресей ІІМ білім беру ұйымдарында 167 тәжікстандық әріптес жоғары білім алуда», — деді Колокольцев.

Министр жалпы екі мемлекеттің аумағындағы қылмыстық ахуал бақылауда қалып отырғанын атап өтті. Оның айтуынша, 2024 жылы Тәжікстан азаматтары тарапынан да, оларға қатысты да құқыққа қайшы әрекеттер саны азайды.

РТ ведомствосының мәліметінше, Рахимзода өз сөзінде екі елдің ішкі істер органдарының ынтымақтастығы «алқаның бірлескен отырысы шеңберінде одан әрі дамып, жетілдіріліп жатқанын»атап өтті.

Тәжікстан және Ресей Ішкі істер министрліктерінің біріккен алқасының отырысы жыл сайын 1999 жылдан бері өткізіліп келеді.

Фото: ашық дереккөздерден