O‘zbekiston Transport vazirligi va BMTning Taraqqiyot dasturi vakolatxonasi “Toshkent — kam uglerodli avtotransportga sarmoyalarni jalb etishni jadallashtirish” loyihasining Muvofiqlashtiruvchi kengashi yig‘ilishini o‘tkazdi. Uchrashuvda 2024-yildagi faoliyat yakunlari sarhisob qilindi va kelgusi yilga mo‘ljallangan rejalar tasdiqlandi.

Loyihaning ayollarga katta sig‘imli avtobuslarni boshqarish huquqini beruvchi qarorni ishlab chiqishdagi hissasi alohida ta’kidlandi. Ushbu qaror Toshkent shahrida ayol haydovchilarni ish bilan ta’minlashda muhim qadam bo‘ldi.

Shuningdek, elektrobuslarning foydali jihatlari haqida ma’lumot taqdim etildi. Ularning har biri yiliga 70 tonna karbonat angidrid chiqindilarini kamaytirish imkonini beradi. Shaharda foydalanilayotgan elektrobuslarning bir qismi Global ekologiya jamg‘armasi ko‘magida xarid qilingan.

2025-yilda ilmiy tadqiqot ishlarini kuchaytirish rejalashtirilmoqda. Bu maqsadda loyiha Toshkent davlat transport universiteti bilan hamkorlik qiladi.