O‘zbekiston Prezidenti Shavkat Mirziyoyev 2025-yildan boshlab amalga oshiriladigan kambag‘allikka qarshi kurashish va fuqarolar turmush darajasini yaxshilashga qaratilgan asosiy tashabbuslarni ma’lum qildi. Eng muhim yangiliklardan biri — 10 dan ortiq hujjatlar, jumladan tug‘ilganlik guvohnomasi, talaba guvohnomasi va bank kartalarini o‘rnini bosadigan Yagona ijtimoiy karta joriy etilishi bo‘ladi. Bu karta jamoat transportidan bepul foydalanish hamda kompensatsiya va nafaqalarni olish imkonini beradi.

Kambag‘allik darajasi yuqori bo‘lgan mahallalarda oilaviy bog‘chalar tashkil etilib, ulardagi o‘rinlarning 15 foizi kam ta’minlangan oilalar farzandlariga ajratiladi. 118 ming nafar kam ta’minlangan yoshlar uchun to‘garaklar ochiladi, bunda ularning qatnash xarajatlarining 80 foizigacha qismi byudjetdan qoplanadi. Shuningdek, davlat xususiy sektorning mehnatga layoqatsiz oila a’zolarini parvarishlash xizmatlariga sarflaydigan xarajatlarining 80 foizigacha qismini o‘z zimmasiga oladi.

Har bir viloyat va tuman shifoxonasida nogironlarni reabilitatsiya qilish markazlari tashkil etiladi, nogironligi bo‘lgan shaxslarni ishga oladigan korxonalar uchun ijtimoiy soliq 1 foizgacha kamaytiriladi. Bunday korxonalarga surdotarjimonlar, psixologlar va ko‘rish qobiliyati zaif shaxslarga hamrohlik qiluvchilar xizmatlari uchun subsidiyalar beriladi, nogironlarni ishga joylashtirish bilan shug‘ullanuvchi agentliklarga esa 40 ming dollargacha miqdorda grantlar ajratiladi. Mamlakatning har bir tumanida imkoniyati cheklangan bolalar uchun bog‘chalarda inklyuziv guruhlar tashkil etiladi, nogironlar bilan ishlaydigan murabbiylarning ish haqi esa 50 foizga oshiriladi.