YUNESKOning dastlabki nomzodlar ro‘yxatida O‘zbekistonning beshta tabiiy meros obyekti haqidagi ma’lumotlar yangilandi. Zomin, Hisor va Shohimardon tog‘lari, Sarmishsoy qoyatosh suratlari va Boysun hududidan tashqari, Qo‘hitang tog‘lari va Nurota tog‘ tizmasi ham bu ro‘yxatga kiritildi.

Nomzodlik hujjatlarini tayyorlash ishlari Ekologiya, atrof-muhitni muhofaza qilish va iqlim o‘zgarishi vazirligi tomonidan YUNESKO ishlari bo‘yicha Milliy komissiya bilan hamkorlikda olib borildi. Ushbu hujjatlar YUNESKOning 1972-yildagi Konvensiyasi talablariga mos kelganligi sababli, YUNESKOning Butunjahon merosi markazi tomonidan yuqori baholandi.

O‘zbekistonning dastlabki ro‘yxati oxirgi marta 2008-yilda yangilangan bo‘lib, 16 yildan so‘ng ma’lumotlarni yangilash bo‘yicha keng ko‘lamli ishlar amalga oshirildi. Tashkilot mezonlariga ko‘ra, ro‘yxatlar har o‘n yilda yangilanishi lozim.

Sarmishsoy qoyatosh suratlari va Boysun hududi tabiiy va madaniy merosni o‘zida mujassamlashtirgan aralash obyektlar sifatida belgilangan. Yangi nomzodlar — Qo‘hitang tog‘lari va Nurota tog‘ massivi — faqat tabiiy ahamiyatga ega obyektlar sifatida taqdim etilgan.