Senatning ikkinchi yalpi majlisida ‘2025-yilga mo‘ljallangan soliq va byudjet siyosatining asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartishlar kiritish to‘g‘risida»gi qonun muhokama qilinib, ma’qullandi.

Qabul qilingan o‘zgartirishlar qonunchilikni Jahon savdo tashkiloti talablariga moslashtirish, tadbirkorlik faoliyatini osonlashtirish va Prezidentning tadbirkorlar bilan ochiq muloqotida belgilangan vazifalarni amalga oshirishga qaratilgan.

2025-yil uchun asosiy soliq stavkalari o‘zgarishsiz qoldi: qo‘shilgan qiymat solig‘i 12 foiz, foyda solig‘i 15 foiz, jismoniy shaxslardan olinadigan daromad solig‘i 12 foiz, yuridik shaxslarning mol-mulk solig‘i 1,5 foiz darajasida saqlab qolindi. Shuningdek, 2025 yildan boshlab mobil aloqa xizmatlariga aksiz solig‘i bekor qilinadi, nashriyot va matbaa korxonalari esa 2029 yilgacha bo‘lgan davrda foyda solig‘idan ozod etiladi.

Xalq deputatlari mahalliy Kengashlarining vakolatlari kengaytirildi. Endi ular yakka tartibdagi tadbirkorlar uchun qat’iy belgilangan soliq stavkalarini mustaqil ravishda o‘rnatishlari hamda hududlardagi iqtisodiy vaziyatga qarab suv va tabiiy resurslardan foydalanish uchun soliq stavkalarini moslashtirishlari mumkin bo‘ladi.

Senatorlar soliq siyosatidagi o‘zgarishlar tadbirkorlik uchun qulay shart-sharoitlar yaratish, sog‘lom turmush tarzini qo‘llab-quvvatlash va atrof-muhitni muhofaza qilishga yo‘naltirilganini ta’kidladilar.