Senatning ikkinchi yalpi majlisida ‘O‘zbekiston Respublikasining 2025-yil uchun Davlat byudjeti to‘g‘risida‘gi qonun ko‘rib chiqilib, ma’qullandi. Hujjatda asosiy e’tibor aholi farovonligini oshirish, kambag‘allikni qisqartirish, ijtimoiy sohani, yashil iqtisodiyotni rivojlantirish va atrof-muhitni muhofaza qilishga qaratilgan.

Qonunga ko‘ra, 2025-yilda konsolidatsiyalashgan byudjetda 431 trillion so‘m daromad va 480,5 trillion so‘m xarajat ko‘zda tutilgan. Byudjet taqchilligi yalpi ichki mahsulotning 3 foizidan oshmaydigan darajada belgilangan. Davlat byudjeti daromadlari 308,5 trillion so‘mni, xarajatlari esa 344,8 trillion so‘mni tashkil etadi.

Byudjetning ijtimoiy yo‘naltirilganligiga alohida e’tibor qaratilgan bo‘lib, uning xarajatlarining 52 foizi yoki 177,7 trillion so‘mi ijtimoiy sohani yaxshilashga yo‘naltiriladi. Sog‘liqni saqlash sohasiga 41,3 trillion so‘m yoki joriy yilga nisbatan 19,8 foiz ko‘p mablag‘ ajratish rejalashtirilmoqda. Ekologiyani muhofaza qilish tadbirlari uchun 3,6 trillion so‘m mablag‘ ko‘zda tutilgan.

Senatorlar byudjet daromad bazasini kengaytirish, mablag‘lardan maqsadli foydalanish va hududlardagi ijtimoiy muammolarni hal etishga qaratilgan chora-tadbirlarni amalga oshirish masalalarini muhokama qildilar. Mahallalar infratuzilmasini yaxshilash, ta’lim va sog‘liqni saqlashni rivojlantirish hamda ekologik mas’uliyatni rag‘batlantirish rejalari ta’kidlab o‘tildi.

Muhokama yakunida qonun bir ovozdan ma’qullandi.