2024-yil 2-13-dekabr kunlari Ar-Riyodda bo‘lib o‘tgan BMTning Cho‘llanishga qarshi kurash bo‘yicha konvensiyasi (COP16) Tomonlari konferensiyasida O‘zbekiston tashabbusi birinchi marta yakuniy qarorda o‘z aksini topdi.

Samarqandda o‘tkazilgan CRIC21 yig‘ilishida taqdim etilgan qum va chang bo‘ronlari bo‘yicha Samarqand deklaratsiyasi rasman tan olindi hamda Konvensiyaga a’zo barcha davlatlarga qo‘shilish taklif etildi.

O‘zbekiston tashabbusini konferensiyaning yakuniy hujjatiga kiritish bo‘yicha muzokaralar butun COP16 davomida olib borildi. Qiyinchiliklarga qaramay, uni Konvensiyaga a’zo 197 davlatning ko‘pchiligi qo‘llab-quvvatladi, bu esa yakdillikka erishish imkonini berdi. Bu O‘zbekiston konferensiyada ishtirok etgan 29 yil mobaynida mamlakat taklifi COP yakuniy qarorlariga kiritilgan birinchi holat bo‘ldi.

Samarqand deklaratsiyasida ilmiy tadqiqotlarni, xalqaro hamkorlikni, erta ogohlantirish tizimlarini kuchaytirish va qum hamda chang bo‘ronlariga qarshi kurash choralarini milliy rejalarga singdirish zarurligi ta’kidlangan. Hujjat, shuningdek, moliyaviy va texnik resurslarni safarbar etish, yerlardan barqaror foydalanish, shaharlarni ko‘kalamzorlashtirish va aholi xabardorligini oshirishga da’vat etadi.